Бөгүн Тыва Республиканың Чазаанга Частың болгаш күш-ажылдың байырлалынга тураскааткан Россия Федерациязының болгаш Тыва Республиканың күрүне шаңналдарын тыпсыр байырлыг хемчег болуп эрткен. Регионнуң Баштыңы Владислав Ховалыг республиканың күш-ажылчы кижилеринге байырны чедирген.
Майның бири тургузукчу күш-ажылга, ниитилелдиң чаңгыс демниинге база Ада-чурттуң тайбың чоруу болгаш чечектелиишкини дээш чүткүлге хүндүткелди илередип турарын ол демдеглээн.
Тываның төөгүзү келир салгалдар дээш кызымаккай күш-ажылдың үлегер-чижээ-биле байлак дээрзин Баштың айыткан. Ада-чурттуң Улуг дайынының чылдарында республика чурттакчыларының фронтуга дузаламчызы, тоолчургу “Кызыл кошту” организастааны, дайынчы техниканы туттурар дээш акша-хөреңги чыгган үлүг-хуузу онза черни ээлээн.
«Шак ындыг тургузукчу сеткил-хөөн, төөгүден камгамчыктыг арга-дуржулга бөгүнде база хевээр арткан – бүгү республика, күш-ажылчы коллективтер, суурлар болгаш хоорайлар чурттакчылары тускай шериг операциязының киржикчилеринге деткимче кылдыр чүъктү болгаш техниканы чыып турар» — деп, Владислав Ховалыг демдеглээн.
Амыг үеде республика шапкын хөгжээн: чаа бажыңнар, амгы үениң школалары болгаш эмнелгелери туттунуп, бүдүрүлгелер ажыттынып, аныяктар профессионал адырларда боттарын көргүзүп, перспективтиг бизнес эгелээшкиннерни саналдап турар.
Аңгы-аңгы адырларда бедик чедиишикиннерни чедип алган республиканың чурттакчыларынга күрүне шаңналдарын тыпсыр езулалды эрттирген. Тывада Тургузукчу күш-ажылдың болгаш өг-бүле ыдыктарының чылында шалып ишчилерни бөгүн шаңнааны өөрүнчүг.
Мөңгүн-Тайга кожуунда тараачын-арат ажыл-агыйының баштыңы Юрий Чамбал «Россия Федерациязының көдээ ажыл-агыйының хүндүлүг ажылдакчызы» хүндүлүг атты алган.
Эрзин кожууннуң Мөрен школазының сан башкызы Галина Ондар, Сарыг-Сеп суурнуң Ю.А. Гагарин аттыг школаның директорунуң оралакчызы Татьяна Спрыгина, Бүрен-Аксы суурнуң школазының немелде өөредилге башкызы Орлан Ондар, «Хензигбей» уруглар садының эргелекчизи Салбакмаа Хүрең-оол, Чаа-Хөл суурда Ш.Ч. Сат аттыг школаның директорунуң оралакчызы Елизавета Анай «Тыва Республиканың өөредилгезиниң алдарлыг ажылдакчызы» хүндүлүг аттарга төлептиг болганнар.
Республиканың спортчу хүреш федерациязының тренер башкызы Оскал-оол Кысыгбайга «Тыва Республиканың алдарлыг тренери» атты тывыскан.
«Тываполиграф» КХН-ниң эрттирилге пунктузунуң контролеру Раиса Ховалыг «Тыва Республиканың алдарлыг ажылдакчызы» атка төлептиг болган
Мугур-Аксының уругларның уран чүүл школазының башкызы Чимис Очурга «Тыва Республиканың культуразының алдарлыг ажылдакчызы» атты тывыскан.
Республиканың Чонну ажылга хаара тудар төвүнүң директорнуң оралакчызы Надежда Плотникова «Тыва Республиканың чурттакчы чоннуң социал камгалалының алдарлыг ажылдакчызы» атты алган.
Республиканың наркология диспансериниң терапевт эмчизи Надежда Ооржакка «Тыва Республиканың алдарлыг эмчизи» атты адыш часкаашкыннары-биле тывыскан.
Тыва үндезин культура төвүнүң специализи Омак Оюн «Тыва Республиканың алдарлыг мастери» хүндүлүг атка төлептиг болган.
Сүт-Хөл кожуун чагырга даргазының оралакчызы Чойганмаа Монгушту «Төлептиг ажыл албаны дээш» деп хөрек демдээ-биле шаңнаан.
Тываның күрүне университединиң доцентизи Павел Тапышпанга «Шылгараңгай күш-ажылы дээш» деп Тыва Республиканың медалын тывыскан.
Эгин кожа 50 ажыг чыл чурттаан өг-бүлелер: Михаил Васильевич биле Вера Ивановна Калининнерни база Михаил Курсетович биле Клара Очуровна Кара-Салдарны «Өг-бүлениң үнелиг чүүлдерин кадагалап арттырганы дээш» деп Тыва Республиканың медальдары-биле шаңнаан.