Тываның Баштыңы Владислав Ховалыг апрельдиң 29-та Каа-Хем суурда «Победа» чаа спорт-культура төвүнге болган «Түңнел бар!» деп регионалдыг отчеттуг форумга киришкен. Регион девискээринде «Чаңгыс демниг Россия» партияның Улусчу программазының беш чыл дургузунда кылган ажылдарын түңнээри – хемчегниң сорулгазы болган. Форумга төлевилелдиң хөй санныг хемчеглерин хевирлеп, ооң боттаныышкынынга үлүг-хуузун киирген кижи бүрүзү - партияның эге салбырларының төлээлери, волонтерлар, идепкейжилер, бүгү деңнелдиң депутаттары чыглып келген.
Тывага Улусчу программаны боттандырган беш чылдың дургузунда өөредилге, кадык камгалал, культура, спорт, орук ажыл-агый болгаш чаагайжыдылга адырында 1500 ажыг объектилер туттунган, чаартынган, долу септеттинген. «Бо саннарның артында боттуг ажыл-херектер бар болгаш, чоргаарланыр чүүлдеривис хөй» -деп, регионнуң Баштыңы демдеглээн.
Чижээ, 12 чаа школалар туттунган, 55 школада капитал септелгелерни кылган, 8 уруглар садтарын база янзы-бүрү уруглар садтарынга 21 тудугну немей туткан, уругларга 1800 ажыг немелде олуттарны тургускан. Кадык камгалал адырында 34 чаа фельдшер-акушер пунктуларын база 12 эмнелге амбулаторияларын ажыткан, 21 эмнелге объектилерин септээн. Орук инфраструктуразының талазы-биле алырга, 283 километр оруктарны чаартып, 49 көвүрүглерни чаагайжыткан. Оон ыңай 141 хөй-ниити черлерин чаагайжыткан, чурттакчыларның дилээ-биле 17 көдээ культура төптерин, 19 модельдиг библиотекаларны, 158 спортчу объектилерни туткан.
Республика чурттакчыларының кииргени 50 муң ажыг дилеглериниң 95 хуузу күүсеттингени — чуртта эң бедик көргүзүглерниң бирээзи. «Кижи бүрүзү хүн бүрүде ажыглап турарын көрүп турар. Ол дээрге бистиң ажылывыстың түңнели-дир. Тудугжу, эмчи, башкы, фермер, сайгарлыкчы кижи бүрүзүнге — тургузукчу ажылдың шупту кижилеринге четтиргеним илереттим. Бистиң партиядан эш-өөрүмге, депутаттарга, эге болгаш тус черниң салбырларының секретарьларынга, идепкейжилерге четтирдим. Бодунуң күжүн, үезин, күш-ажылын берген кижи бүрүзүнге четтирдим» - деп, Владислав Ховалыг демдеглээн.
Улусчу программа чурттакчыларның дилеглерин боттуг төлевилелдерже болгаш национал инициативаларже шилчидеринге бодунуң дээштиин бадыткаан.
Чаа Улусчу программа 2.0 амгы үениң айтырыглары — тускай шериг операциязын, импортту солуурунуң айтырыглары, технологтуг болгаш экономиктиг бот-догуннаашкынны барымдаалап ажылдап кылдынган. ТШО-нуң киржикчилерин болгаш оларның өг-бүлелерин деткииринче, патриотчу кижизидилгеже, чаңчылчаан үнелиг чүүлдерни кадагалаарынче онза кичээнгейни угландырып турар. «Бо бүгү чаарттынган программаны болгаш чаа шиитпирлиг хемчеглерни негеп турар» - деп, регионнуң Баштыңы демдеглээн.
Тывада үнүүшкүннүг «төгерик столдар» чорудуу-биле программаны ажылдап кылган. Чоокку беш чылдың дургузунда кожуун болгаш хоорай бүрүзүнге мурнады боттандырар ужурлуг боттуг болгаш чугула беш төлевилелдерни тодараттынган. Бо арга соңгукчуларның мурнунга партияның ажыл-чорудулгазының болгаш харыысалгазының үлегери апарган. Бо хүнге чедир «Улусчу программа 2.0» деп программаже Тываның чурттакчылардан 50 муң хире чагыглар кирген, естьрезультат.рф сайтыда санал-оналдар чыылдазы уламчылап турар.
Форум үезинде партияның Дээди Чөвүлелиниң Даргазы Борис Грызловтуң болгаш партияның Чиңгине Чөвүлелиниң секретары Андрей Турчактың өөрүп четтириишкин бижиктерин эң эки эге салбырларга болгаш идепкейжилерге тывыскан. Россияның Маадыры, Тыва Республиканың Аныяктар херектериниң сайыды база ТШО киржикчизи Буян Кууларга база ТШО киржикчизи Петр Шатохинге партийжи билеттерни байрылыг байдалга тывыскан.
«Түңнел бар!» форум партия болгаш хөй-ниити төлээлери-биле ажык чугааның шөлчүгежи апарган. Регионалдыг күүсекчи комитет даргазының бирги оралакчызы Шеңне Ховалыгның чугаазы-биле алырга, «Чаңгыс демниг Россия» партияда 2026 чылды тус чер салбырларының чылы кылдыр чарлаан. Тываның регионалдыг салбыры партияның 25 чылдаан оюнга тураскаадып, «25 буянныг үүле» деп акцияны эгелээр. Тус черниң салбырлары бо акция-биле социал ужур-уткалыг инициативаларны саналдап, республиканың чурттакчыларын деткииринче болгаш кол угланыышкыннарны хөгжүдеринче угланган төлевилелдерни боттандырар.