Шагаан-Арыгда хөй ажыглалдыг чаа спорт комплекизиниң тудуунуң чер ажылдары эгелээнин республика Баштыңы Владислав Ховалыг МАХ-та бодунуң каналынга дыңнаткан. Келир үениң спорт комплекизи волейбол, баскетбол, бокс болгаш өске-даа спортчу хевирлерге ойнаар үш делгем залдарлыг болур. Спортчу объектини келир чылдың төнчүзүнге чедир ажыдары планнаттынган.
«Кадык амыдыралче чаңгыс чер чурттугларывысты хаара тудуп белеткээринге таарымчалыг байдалдарны тургузары бистиң мурнады боттандырар сорулгаларывыстың бирээзи» - деп, Баштың бодунуң дыңнадыында демдеглээн.
«Көдээ девискээрлерниң комплекстиг хөгжүлдези» күрүне программазы-биле төлевилел боттанып, республиканың чурттакчыларынга амгы үениң спортчу инфраструктуразының чедингирин чедип алырынче угланган
«Тыва Республикага күш-культура болгаш спортту хөгжүдери» күрүне программазы-биле республиканың бүгү девискээринде спортчу инфраструктураны хөгжүдериниң системалыг ажылы чоруп турар. Эрткен чылын «Эзирлер уязы» деп сес бичежек спортчу залдарның тудуу эгелээн, чоокта чаа Сарыг-Сеп суурда бир тудугну доозуп, ажыглалче киирген. «Эльбрусметалл-Литий» компанияның инвестор деткимчези-биле ол бичии залдарны тудуп турар.
Бо чылын «угаанныг» спортчу шөлдер, ГТО шөлдери, ангарлыг спорт залдары, ол ышкаш модульдуг болгаш күш-культуржу-спортчу залдар, хүреш залдары база эштир бассейн дээн ышкаш улуг объектилер болгаш өске-даа спортчу объектилерни тудуп, эде чаартыры планнаттынган. Оон аңгыда республиканың спортчу школаларының амгы оран-савазынга капитал септелгелерни кылып, спортчу дериг-херекселдерин чаартыры көрдүнген.