Республика спортчу инфраструктураны хөгжүдүп, чурттакчы чонну амыдыралдың идепкейлиг болгаш кадык овур-хевиринче хаара тударынга байдалдарны тургузар дээн ажылдарны доктаамал чорудуп турар. Бо чылын регион аңгы-аңгы чурттакчылыг черлерде кудумчуларга спортчу дериг-херекселдерлиг он чаа спортчу шөлдү тударын планнаан. Ооң дугайында Тываның Баштыңы Владислав Ховалыг МАХ-та бодунуң каналынга дыңнаткан.
«Спорт кижи бүрүзүнге чедингир болур ужурлуг. Аныяктарывыс күш-шыдалдыг өзүп, кадык келир үени шилип алырынга байдалдарны тургузарын ам-даа уламчылаар бис» - деп, Владислав Ховалыг демдеглээн.
Федералдыг программалар шугуму база партнерларның деткимчези, ооң иштинде Ажаалга банкызы-биле кады ажылдажылганың ачызында төлевилел боттанып турар. Эрткен чылдың сентябрьда, Ажаалга банкызының Баштаар чериниң даргазы Герман Греф Тывага кээп чорда, аңаа хамаарышкан дугуржулгага ат салдынган.
Амгы үеде чурттакчыларга таарымчалыг болгаш чедингирин көрүп, спортчу объектилерниң турар таарымчалыг черлерин шилиир ажылдар чоруп турар. Ол чүүл чурттакчы чоннуң чаа шөлдерге бедик хереглелин хандырар болгаш спортче хаара тударын деткиир. Чаа спортчу шөлдер регионнуң амгы инфраструктуразынга чугула немелде болуп, ылаңгыя аныяктар ортузунга кадык амыдыралды суртаалдаар.
Эрткен чылын Ажаалга банкызы-биле кады ажылдажылганың ачызында республиканың кудумчуларында спортчу ийи шөл – Кызылда база Ак-Довуракта туттунган.