Тываның Баштыңы российжи парламентаризм хүнү-биле республиканың чурттакчыларынга байырын чедирген. Дээди Хурал, Төлээлекчилер хуралдары дээш, шупту деңнелдиң парламентизи чон-биле шынчы чугааны болгаш дорт харылзааны хандырар онза рольду күүседип турарын, Владислав Ховалыг демдеглээн.
Тывада парламент системазының болгаш улусчу эрге-чагырганың дөзү 1921 чылдың августа Бүгү-Тываның тургузукчу хуралындан эгезин алган. Аңаа Тыва Арат Республика — бот-догуннаан күрүне тургустунганын чарлап, ооң бирги Үндезин хоойлузун хүлээп алган. Амгы хоойлужудулга болгаш төлээлекчи эрге-чагырга органнары төөгүден харылзааны кадагалап, демократияның хөгжүлдезинге үлүг-хуузун киирип, регионда үре-түңнелдиг эргелеп-башкарылганы чорудуп турар.
2026 чылды Тывада Чогаадыкчы күш-ажылдың болгаш өг-бүле ыдыктарының чылы кылдыр чарлаанын Владислав Ховалыг сагындырган. Бо дээрге бүгү деңнелдерде болгаш адырларда эрге-чагырганы, ол ышкаш республиканың чурттакчыларын каттыштырган кижи бүрүзүнге билдингир мурнады боттандырар ниити айтырыглар-дыр. Бо каттышкан күжениишкиннерниң кол сорулгазы – күш-ажылдың кижилерин деткиири, салгалдан салгалче дамчып келген мөзү-шынар угланыышкыннарын камгалаарын хандырары болгаш чурттуң чаңгыс демин быжыглаары.