Чөөн-Хемчик кожууннуң «Бора-Булак» деп чери аът спортунга ынактарны база катап хаара туткан. Тыва чоннуң чылдың-на четтикпейн манаары спорттуң национал хевири – аът чарыжының 33-кү сезонун албан езузу-биле маңаа ажыткан. Тываның Баштыңы Владислав Ховалыг байырлыг ажыдыышкынга киржип, чыылган чон-биле кады эң-не тергиин чүгүрүк аъттар болгаш мунукчулар киришкен улусчу маргылдааларны көрген.
Солун чарыштарны көрүп, киржикчилерни деткип, байырлалдың езулуг хей-аъдын алыр дээш, 3 муң хире кижи чыглып келген. Чидиг маргылдаалыг, чараш тиилелгелерлиг алды салыгда мунукчулар чүгле дүргенин эвес, а быжыг тура-соруун, шыдамык чорун болгаш мергежилин көргүскен.
Мындыг чарыштар – салгалдарның дириг харылзаазының бадыткалы. Республиканың аңгы-аңгы кожууннарындан кижилерни эвилелдээн ужур-чаңчылдар, спорт болгаш адаанажылганың соруу каттышкан. Чамдыктары маңаа бодун көргүзер дээн болза, өскелеринге өг-бүлези база эш-өөрү-биле үе эрттирер эптиг чылдагаан болган, а дыка хөйүнге – төрээн чериниң культуразын база катап көөр аас-кежик-тир.
«Чурум чокта чүү-даа чүве болдунмас. Мунукчуларның хар-назынындан эгелээш, камгалал дериг-херексели база документилеринге чедир – дүрүмнер сагылгазын шыңгыы негээр бис. Бо дээрге айыыл чок чоруктуң база шынчы демиселдиң айтырыглары-дыр. Киржикчи бүрүзү корум-чурумнуг болгаш харыысалгалыг болурунга бүзүрээр мен» — деп регионнуң Баштыңы маргылдаа мурнунда чугаалааш, аът чарыжы киржикчилерге болгаш көрүкчүлерге чүгле эки сактыышкыннарны артырып, маргылдаа доктааттынган чурум езугаар эртсин дээш бүгү-ле хемчеглерни алырын харыысалгалыг кижилерге чагаан.
Маргылдаа үезинде айыыл чок чорукче эң улуг кичээнгей салдынган. Полиция ажылдакчылары корум-чурумну база орук байдалын хайгаараан. Күрүнениң автоинспекциязының ажылдакчылары айыылдыг зоналар – аът чарыжының шөлүнче, орук кыдыынче база удур келир орукче машиналар халдывазын дээш контрольду чоруткан. Ол ышкаш орукта байдалды агаардан дрон дузазы-биле хайгаараан. Корум-чурум тудукчулары чурум үрээн барымдааларны ол дораан илередип, хемчеглерни алганындан, аът чарыжы организастыг болгаш эки эрткен.
Аът чарыжының тиилекчилери чаңчыл езугаар өртектиг шаңналдарны, ол ышкаш чаа автомобильдерни алгаш, өөрүшкүнүң долгандырыын адыш часкаашкыннарының адаа-биле кылган.
Республиканың Баштыңы Владислав Ховалыг Тываның көдээ ажыл-агый болгаш мал-маган адырынга шылгараан ажылдакчыларга күрүне шаңналдарын тывыскан. Каа-Хем кожуундан чылгычы Владимир Белекпен « Тыва Республиканың алдарлыг чылгычызы» хүндүлүг атты, Бии-Хем кожууннуң Сесерлиг сумузундан хууда дузалал ажыл-агыйларының баштыңнары Альберт Тондуп биле Суград Айыы «Тыва Республиканың алдарлыг аът соодукчузу» деп хүндүлүг аттарны алган.