Россия Федерациязының Президентизиниң Сибирь федералдыг округда бүрүн эргелиг төлээзи Анатолий Серышевтиң даалгазы езугаар, ооң оралакчызы Вадим Головко Россияның үлетпүржүлер болгаш сайгарлыкчылар эвилелиниң салбырларының координация чөвүлелиниң Новосибирск хоорайга болуп эрткен калбак хуралынга киришкен.
Сибирь федералдыг округ субъектилеринде бизнестиң үлетпүр кооперациязын хөгжүдери кол тема болган. Бүрүн эргелиг төлээ регионнарга ажыл-агыйжы үнүүшкүннер үезинде бүдүрүлгелерге барып, нарын айтырыгларны чогударынга дузалажып, оларны мурнады шиитпирлээринче кол кичээнгейни углаан. Россияның үлетпүржүлер болгаш сайгарлыкчылар эвилелиниң президентизи Александр Шохин бүрүн эргелиг төлээниң күрүне-хууда болгаш бизнес-биле кады ажылдажылгазын организастаарынга улуг сонуургалдыын демдеглээн. Бизнеске сонуурганчыг бүгү-ле угланыышкыннар-биле идепкейлиг ажылдап турарын ол онзалап демдеглээн.
Бүрүн эргелиг төлээ аппарадының база Анатолий Серышевтиң бодунуң идепкейлиг киржилгези-биле 2035 чылга чедир Сибирь федералдыг округтуң социал-экономиктиг хөгжүлдезиниң стратегиязын боттандырар план ажылдап кылдынган. Документиде 18 триллион рубль хире инвестиция хемчээлдиг 85 кластер төлевилелдери кирген. Анатолий Серышев ажылчын ужуражылгаларны эрттирип-даа, тудуг шөлдерин кезип-даа тургаш, дыка хөй төлевилелдерни үргүлчү дүүштүрүп турар.
Вадим Головко хуралдың киржикчилеринге эрге-чагырга органнары биле бизнестиң аразында кады ажылдажылганы сайзырадыр талазы-биле бүрүн эргелиг төлээ аппарадының ажылдарын таныштырган. Ылаңгыя беримчелиг бүдүрүлге четкилерин хевирлээринче онза кичээнгей угланган. Иркутскиниң нефть компаниязының ажылдап эгелээни полимер бүдүрүлгези – көскү чижектерниң бирээзи. Машина тудуунга, медицина, аар болгаш чиик үлетпүрге хереглелдиг төлевилелдиң күчү-күжү чылда 650 муң тонна полимерлер. Бүдүрүлге ажылдап эгелээш 1,6 муң чаа бедик мергежилдиг ажылчын олуттарны тургускан.
Алтай крайда «СИБИРЬ-ПОЛИМЕТАЛЛ» АН Корбалихин чыдынында цинк, чес, коргулчун, алдын, мөңгүн-биле байлак руданы казып, болбаазырадыр бүдүрүлгениң 2-ги болгаш 3-кү ээлчээн ажылдадып эгелээн. Кончуг улуг хергеледиг ол шугумнарның күчү-күжү чылда 1,5 миллион тонна чедир концентратты бүдүрер.
«Сибирский кольцевой источник фотонов» коллективтиг ажыглал төвүнүң тудуу үлетпүр кооперациязын тургузарының эң-не көскү чижээ болган. Комплекстиң бедик технологтуг шупту дериг-херекселдерин Россияга бүдүрген. Ону ажылдап кылырынга болгаш бүдүреринге Россияның аңгы-аңгы регионнарындан, ооң иштинде Новосибирск, Томск, Белгород, Казань, Челябинск, Москва хоорайлардан 1,5 муң ажыг компаниялар киришкен.
Бизнести деткиири, ылаңгыя амгы байдалда, бүгү деңнелдиң күрүне албан черлериниң кол сорулгазы бооп артпышаан деп, бүрүн эргелиг төлээниң оралакчызы демдеглээн. Ооң-биле чергелештир, инвесторларның харыысалгалыг хамаарылгаларын хандырар база төлевилелдер күүселдезин соңгаарладырын болдурбас дээш ажылдаары чугула. Ынчангаш чидиг айтырыгларны үезинде тодарадып, оларны шиитпирлээр хемчеглерни ап, харыысалгалыг бизнести деткиир адрестиг хемчеглерни боттандырар. Сибирь регионнарынга ону ажыглалче киирер бир арга – Анатолий Серышевтиң эгелээшкини-биле чоруп турар ЭКГ рейтинг деп, Вадим Головко чугаалаан.
Экономиканың эң кол шимчедикчи күжү кадрларда болур деп, бүрүн эргелиг төлээниң оралакчызы демдеглээн. «Ректорлар чөвүлелиниң ажылынга катчып, бүдүрүлгелерге езулуг херек специалистерни тускай белеткээр кады ажылдажылгаже РҮСЭ-ни чалап тур бис» - деп, ол чугаалаан. Россия Федерациязының Президентизиниң технологтуг тергиидекчи чорукту хандырар дээн национал сорулгазын чедип алырынга хуралдың түңнели-биле хүлээп алган шиитпирлер улуг үлүг-хуузун киирер дээрзинге бүрүн эргелиг төлээниң оралакчызы идегээн.
Россияның үлетпүр болгаш сайгарлыкчылар эвилелиниң президентизи Александр Шохин (видеоконференция дамчыштыр), Новосибирск облазының губернатору Андрей Травников, СФО-да РҮСЭ салбырларының координация чөвүлелиниң даргазы база «Нориль никели» ДМК» ПАН-ның бирги вице-президентизи – эрге-чагырга-биле харылзаа тудар блоктуң удуртукчузу Николай Уткин, РҮСЭ-ниң регионалдыг хөгжүлде эргелелиниң вице-президентизи – башкарыкчы директору Сергей Мытенков, регионалдыг эрге-чагырга органнарының, бизнестиң болгаш профэвилел организацияларының төлээлери хуралга киришкен.