Тыва Республиканың Баштыңы Владислав Ховалыг база республиканың Чазаа Алексей Викторович Пимановтуң элекке мөчээни-биле төрээн болгаш чоок улузунга ханы кажыдалын илереткен.
«Чаңгыс демниг Россия» фракция Тываның парламентизинден сенаторже Алексей Пимановтуң кандидатуразын саналдаан соонда, ол 2011 чылдан 2013 чылга чедир Федерация Чөвүлелинге бистиң республикавысты төлээлеп ажылдаан. Камгалал болгаш айыыл чок чорук комитединиң составынга ажылдап, бодунуң бүрүн эргелерин күүседип, бистиң республикавыска кээп чораан. Лариса Кужугетовна Шойгу-биле кады Тываның салым-чаяанныг аныяктарын деткиири-биле адын бижээн премияны тургускан. Бо хүннерге чедир ажылдааны «Красная звезда» медиахолдингиже шилчээни-биле сенаторнуң бүрүн эргелерин хүлээткен.
1996 чылдан бээр Алексей Пиманов он-он чылдар дургузунда Бирги каналдың арны апарган «Кижи болгаш хоойлу» программаның солуттунмас башкарыкчызы кылдыр хөйге билдингир. Ол үе дургузунда (1996-2010 чылдарда) «Останкино» телекомпанияның чиңгине директорунга база ажылдаан.
100 ажыг барымдаалыг фильмнерниң автору болгаш шериг төөгү талазы-биле, ооң иштинде Ада-чурттуң Улуг дайынының дугайында драма жанрларыныңболгаш төөгү детективтериниң режиссеру, ада-чурттуң уран-чечен киночуруктарының режиссеру, сценаризи база продюсери кылдыр сурагжаан. Ооң шак ындыг билдингир ажылдарынга «Крым», «СМЕРШ», «Грачи», «Операция Неман», «Зло» база «Одиннадцать молчаливых мужчин» дээн ышкаш төлевилелдерин хамаарыштырып болур. «Кремль-9», «Здоровье», «Жить здорово» база «Армейский магазин» деп телетөлевилелдерни тырттырарынга киришкен.
Россияның Президентизи Владимир Путин Алексей Пимановтуң чок болганы-биле ооң өг-бүлезинге болгаш чоок улузунга кажыыдалын илередип, журналистиң ховар бүдүжүн болгаш шынчы чоруун демдеглеп, ону амгы үениң российжи телевидениезиниң ажылынга бердинген чырык профессионалы деп адап, ооң чок болганы – бүгү ада-чурт журналистиказынга улуг чидириг-дир деп демдеглээн.
РФ-тиң Айыыл чок чорук чөвүлелиниң секретары Сергей Шойгу журналистиң чок болганы-биле кажыыдалды илередип тура, Алексей Пиманов ада-чурт телевидениезиниң болгаш патриотчу теледамчыдылганың хөгжүлдезинге улуг үлүг-хуузун киирип, информация шөлүнге Россияның Чепсектиг Күштериниң овур-хевирин өскерткенин демдеглээн.