Ада-чурттуң Улуг дайынынга Тиилелгениң 81 чылының бүдүүзүнде, Ол дээрге «Чаңгыс демниг Россия» партия төлевилелиниң бир хемчээ болур «Тиилелгениң диктантызы» төлевилелиниң бир болуушкунуу – Тывага үш дугаар авточарышты эрттирген. Апрель 24-те, бо пятницада, чарыш болганын сагындыраал.
Ийи онзагай юбилей - «Юнармия» шимчээшкинниң 10 чылынга болгаш Тыва Республикага Россия Федерациязының национал гвардия шериглериниң федералдыг албанының тургустунганындан бээр 10 чылынга тураскаадып авточарыш болур. «Чаңгыс демниг Россия» политиктиг партияның Тывада регионалдыг салбырының күүсекчи комитеди, Кызылдың школаларындан аныяк армейжилер – хемчегниң кол организаторлары. Тываның Өөредилге яамызы, Росгвардияның Тыва Республикада эргелели, Кызыл хоорайның шериг комендатуразы, Россияның ДОСААФ-ының Тыва Республикада регионалдыг салбыры, Тыва Республиканың Истелге комитединиң Истелге эргелели база Таңды кожууннуң шериг комиссариады - хемчегниң партнерлары.
Эрге-чагырга ажылдакчылары, эрге-хоойлу камгалаар органнар болгаш аңгы-аңгы ведомстволар удуртукчулары, хоорай чурттакчылары болгаш аалчылары, хоочуннар болгаш аныяктарның хөй-ниити организацияларының кежигүннери, Кызылдың 1 биле 3 дугаар школаларындан аныяк армейжилер, Тываның кадет корпузунуң кадеттери база хемчегге киришкен.
Авточарыш Кызылда тускай операцияның киржикчилеринге тураскааткан мемориалдыг комплекстен үнгеш, Чеди-Хөл кожууннуң Хову-Аксы суурга доозулган. Тываның Чазааның Даргазының оралакчызының хүлээлгезин күүседип турар Шолбан Сендаш Чазактың болгаш республика Баштыңы Владислав Ховалыгның өмүнээзинден чыылганнарга байырны чедирген.
«Бо маршрут төөгүлүг сактыышкынны, чаңгыс демнежилгени, ужур-чаңчылдарга бердинген чорукту, келир үеже тура-сорукту илередип турар» - деп, ол демдеглээш, чарыштың киржикчилеринге менди чаагай орукту күзээн.
«Юнармия» штавының удуртукчузу Айдын Шивидек май 9-ка тураскааткан өске-даа патриотчу хемчеглерниң эгезин салган бо чарыштың ужур-утказын тайылбырлаан. Сөөлгү он чылда организацияже бир дугаар кирген аныяк армейжилерниң саны 124 кижиге көвүдеп, 9 муң четкен. Бөгүнде республикада «Юнармияның» 262 отрядтары барын чугаалаан.
Авточарыштың киржикчилерин Хову-Аксынга тус черниң школачылары, аныяк армейжилер, орук шимчээшкининиң аныяк инспекторлары, ОБЯ-ның кадеттери, чагырга чериниң төлээлери болгаш суурнуң чурттакчылары уткуп алганнар. Оларга техника аймаан база идик-хевин сонуургаткан. Росгвардияның ажылдакчылары куяк машина, чепсеглээшкин база камгалалдыг идик-хеп дугайында тайылбырны кылган. Кижи бүрүзү руль артынга орулпкаш, тураскаал кылдыр чурукка тырттырышканнар. Чеди-Хөлдүң аныяк армейжилери «Юнармияның» 10 чылдаан оюнга тураскаадып 10 деп сан кылдыр чыскаалганы – байырлалдың онзагай кезээ болган.
Бо удаада «Тиилелге» авточарыжының чыскаалынга Кызылдың шериг комендатуразының машиназы, куяк-биле шыпкан ВАЗ-тар, Росгвардияның машиналары, Таңды кожууннуң шериг комиссариадының «УАЗ Патриот» машиназы, «Айыыл чок чорук лабораториязы» көжүп чоруур комплекс база хамаатыларның дөрт машиназы киришкен.
Тывага бир дугаар авточарыш 2022 чылда болуп эрткенин сагындыраалы, ооң маршруду Бии-Хем биле Улуг-Хем кожууннарны таварып эрткен. 2025 чылда Тиилелгениң 80 чыл оюнга тураскааткан ийиги авточарыш Тес-Хем биле Эрзин кожууннар девискээрин эрткен.
Ындыг акциялар салгалдар аразында харылзааны быжыглап, төрээн чуртка ынакшылды оттуруп, Ада-чурттуң Улуг дайынының чылдарында-даа, амгы үеде-даа Төрээн чурту дээш тулчуп чораан база тайбың чоннуң сонуургалын камгалап чоруур маадырларның дугайында тураскаалды кадагалап арттырар деп организакчылар санап турар.