Тываның Баштыңының грантызы-биле деткээн массалыг информация чепсектеринге болгаш журналистерге темалары өскерилген. 2026 чылда чуртта болгаш регионда болуп турар болгаш болур чугула болуушкуннар-биле ол сырый харылзаалыг. Ынчангаш Тываның Баштыңының грант мөөрейиниң чурумунче чогуур өскерилгелерни киирген.
Россияның Президентизиниң болгаш Тываның Баштыңының 2026 чылды тодаргай темаларга тураскаадыр дугайында инициативаларын идепкейлиг чырыдып турар медиа-төлевилелдерни шаңналдар-биле деткиири көрдүнген. Бо чылын Россияда чоннарның чаңгыс деминиң, Тывада чогаадыкчы күш-ажыл болгаш өг-бүле ыдыктарның чылдары.
Мөөрейниң ийиги кол темалыг угланыышкыны - Тываның шылгараңгай күш-ажылчыларын, ажылчын мергежилдерни, күш-ажылчы аймактарны, өг-бүле бизнезин нептередип суртаалдарынга тураскааттынган. Республикада келир үеде бот-хандырылганың үндезиннерин салган экономиктиг көдүрлүүшкүн бо хүнде чоруп турар.
Шупту адырларда темпини тудар дизе, бир дугаарында материалдар бүдүрүлгезин, шыырак болгаш мергежилдиг кадрларны деткиир херек. «Амгы үеде Тывада улуг хемчээлдиг тывыш төлевилелдериниң боттандырылгазы чоруп турар. Ындыг болзажок ырадыр көрүп, тус черниң чиг эдинден бедик технологиялыг бүдүрүлгелерни тударын боданыр апаар. Бөгүнгү аныяктарны ынаар хаара тудар херек» - деп, Владислав Ховалыг, регионалдыг кадр политиказын хевирлээринге МИЧ-тиң киирип болур үлүг-хуузун айыткан.
Грант темаларынче төрээн чуртка ынакшылды кижизидеринче, төөгүлүг шынны камгалаарынче болгаш төөгүлүг сактыышкынны кадагалап арттырарынче, Россияның чоннарының ыдыктыг үнелиг чүүлдерин хөй-ниитиниң угаан-медерелинге быжыглаарынче угланган төлевилелдер база кирип турар. Эрткен чылдарда ышкаш, бо угланыышкынга тускай шериг операциязының киржикчилериниң, оларның маадырлыг чоруунуң болгаш салым-чолунуң дугайында информастыг материалдарны аңгы үнелээр.
Мөөрейге киржиринче блогерлерни база чалаан. IV делегей чергелиг сарыг шажын шуулганын социал четкилерге эң эки чырыдып, сүлде-сүзүктүң үнелиг чүүлдерин суртаалдааны дээш оларга аңгы шаңналды доктааткан.
Дүрүм езугаар Тываның Баштыңының грантызы дээш мөөрейге республикага тураскааткан информациялары 75 хуу чедип турар МИЧ киржир. Мөөрей фондузунуң ниити бюджеди 1,6 млн. рубль, ынчангаш тиилекчи бүрүзү 400 муң рубль чедир акша шаңналын ап болур. Киржикчилерниң билдириишкиннеринге даянып, комиссия номинация бүрүзүнден грант акшазын элээн каш бөлүктерже чара хуваап база болур.
Грантылар деткимчезинче кордаан информация төлевилелдериниң дараазында темаларын өскерилгелер-биле тодараткан:
- бүгү-российжи хамааты чаңгыс демни быжыглаарынче, националдар болгаш шажыннар аразында харылзааларны эптештиреринче база экстремисчи чорукту болдурбазынче угланган эң эки медиа-төлевилел;
- Тыва Республиканың хөгжүлдезинге күш-ажылчы курлавырларның ролюнга тураскааткан, Тыва Республиканың чурттакчыларының эрткен болгаш амгы үеде көскү күш-ажылчы чедиишкиннерин чырыткан, ажылчын мергежилдерни болгаш өг-бүлениң күш-ажылын хөгжүдерин нептереткен эң эки медиа-төлевилел;
- хамаатыларның, ооң иштинде аныяктарның патриотчу кижизидилгезинче, төөгүлүг шынны камгалаарынче болгаш төөгүлүг сактыышкынны кадагалап арттырарынче, Россияның чоннарының чаңчылчаан сүлде-сүзүк болгаш мөзү-шынар үнелиг чүүлдерин хөй-ниитиниң угаан-медерелинге быжыглаарынче, тускай шериг операциязының киржикчилериниң маадырлыг чоруктарын алдаржыдарынче угланган эң эки медиа-төлевилел;
- социал четкилерде IV делегей чергелиг буддийжи форумну чырыдып, сүлде-сүзүктүң үнелиг чүүлдерин суртаалдап турар эң эки автор медиа-төлевилели.
Апрельдиң 17-де Тываның Чазааның сайтызында темаларны эдер дугайында шиитпирни парлаан. Мөөрейже билдириишкиннерни 2026 чылдың июнь 11-ге чедир хүлээп алыр.
Мөөрейге киржирде херек документилерниң даңзызын, мөөрейниң дүрүмүн, доктааткан майыкта билдириишкинни rtyva.ru сайтының «Өске документилер» деп кезээнден тып ап болур.