Кызылдың «Южный» микрорайонунда «Солнечный» деп чаа чуртталга комплекизин ажыткан. «Восток» КХН тудуг компаниязы 48 квартиралыг, тос каъттыг ийи чуртталга бажыңнарын ажыглалче киирип дужааган. Республиканың Баштыңы Владислав Ховалыг чаа оран-саваның чурттакчыларга байырны чедирип, таарымчалыг хоорай хүрээлеңин хөгжүдериниң чугулазын демдеглээн.
«Бистиң республиканың чедиишкиннери федералдыг деңнелге безин көскү. Тыва «Амыдыралга инфраструктура» национал төлевилелдиң сорулгаларын хуусаадан эрте күүсеткен регионнар санынче база кирген» - деп, республиканың Баштыңы демдеглээн.
Амгы үениң чуртталга бажыңнарының тудуу регион чурттакчыларының амыдырал-чуртталгазының шынарынга дорт салдарлыын база демдеглеттинген. Тываның Баштыңы төлевилелдиң бедик шынарлыг болгаш үе шаанда доозарын хандырган тудугжуларга болгаш керээ чарган организацияга өөрүп четтириишкинниң онзагай сөстерин илереткен. Компанияның директору Сергей Уюсовтуң чугаазы-биле алырга, чуртталга комплекизиниң тудуун хуусаадан сес ай эрте тудуп доосканы ол.
Хөй ажы-төлдүг өг-бүле, Маадыр-ие Айнааш Ондарга дүлгүүрлерни тывысканы - езулалдың онзагай кезээниң болган. Айнааш Владимировна он ийи ажы-төлүн кижизидип өстүрүп чоруур. Өг-бүлениң ээзи амгы үеде тускай шериг операциязының зоназында хүлээлгезин эрттирип чоруур шериг албанныг. Улуг оглу база дайынчы хөделииишкиннер хоочуну, дайынчы даалгалар үезинде көргүскен маадырлыг чоруу дээш Суворов медалының эдилекчизи. Бо белек Айнааш Владимировнаның улуг өг-бүлезинге кызыгаар чок ынакшылы болгаш кызымаккай күш-ажылынга төлептиг шаңнал болган.
«Биске квартираны тускайлап бергени дээш республика Баштыңынга четтиргенивис илередип тур бис. Бистиң өг-бүлевистиң өмүнээзинден мындыг деткимче дээш четтирдивис» - деп, Айнааш Ондар чугаалаан.
«Солнечный» чуртталга комплекизин амгы үениң негелделеринге дүүштүр туткан. Ол хааглыг боорда, чаагайжыткан девискээрлиг, уруглар ойнаар шөлдүг, автомашина тургузар чер адаанда черлиг, квартираларны таарымчалыг болгаш эптиг кылдыр таарыштыр туткан.
Регионнуң удуртукчузу Владислав Ховалыгның санал-оналы база президент Владимир Путинниң болгаш федералдыг чазактың деткимчези-биле боттандырган чиигелделиг ипотека программазы езугаар, регионалдыг 2 хуулуг ипотека программазы-биле чамдык квартираларны чурттакчылар алган.