Тываның Баштыңы Владислав Ховалыг Россияның «Билиг» российжи ниитилелдиң беш чылдааны-биле байырны чедирген. Ниитилелдиң төлевилелдери чүгле лекциялардан шагда-ла үнгеш, кандыг-даа назылыг кижилерни каттыштырган күштүг угаан-медерел шимчээшкини апарганын ол демдеглээн. «Ажылдың хемчээлин сан-чурагайлар бадыткап турар: бистиң республикада организацияның «катап тургустунганындан бээр» 2000 хире лекциялар эрткен, аңаа 59 муң хире кижи киришкен» — деп, регионнуң Баштыңы МАХ каналында бодунуң арынынга дыңнаткан.
ТШО хоочуннары-биле ажыл онза черни ээлеп турарын чугаалаан: «Бистиң дайынчыларывыс «Ада-чуртка бараан болуптур мен» деп акцияның идепкейлиг киржикчилери апарып, республиканың бүгү булуңнарында аныяктар-биле ажык чугааны чорудуп турар. Салгалдар аразында езулуг харылзааның болгаш патриотчу чоруктуң көскү үлегер-чижээ-дир».
Республика Баштыңы кады ажылдажылгазы дээш өөрүп четтириишкинин илереткеш, Тывага эң таарымчалыг өөредилге хевирин боттандырар талазы-биле ажыл ам-даа уламчылаар дээрзин демдеглээн. Апрель 17-де Москвага болуп эрткен V-ки съезди-биле холбаштыр өөредилге командазынга база катап байырын чедирген. Ол хемчегге ниитилелдиң чаа удуртукчуларын соңгуп, ооң хөгжүлде угланыышкыннарын тодараткан. Съездини «Аныяктар болгаш уруглар» деп национал төлевилел чорудуу-биле эрттирген.
«Билиг» ниитилелиниң Тыва салбыры болгаш регионалдыг салбыры 2025 чылда ажыл-чорудулгазы-биле чуртта эң-не шылгараңгай оннуң санынче киргеннер. Республика баштыңының даалгазы-биле Ада-чурт камгалакчызының чылында база Тиилелгениң 80 чылында фашистиг эжелекчилер-биле демиселге тыва эки турачыларның болгаш тылда чурттакчыларының маадырлыг чоруунга тураскааткан боттарының лекциялары чырыдыышкын ажылының кезээ апарган. Чырыдыышкын ужуражылгалары регионнуң өөредилге черлеринде 2500 хире кижини хаара туткан.
Патриотчу угланыышкын идепкейлиг чоруп турар: ТШО хоочуннары болгаш киржикчилери школаларга болгаш өөредилге черлеринге эрес-дидим чорук кичээлдерин эрттирип, аныяктарның улуг сонуургалын болдурган. Ниитизи-биле 800 хире хемчегге 27 муң дыңнакчылар киришкен.
Бо чылын салбырның ажылының кол угланыышкыны – Россияның Президентизи Владимир Путинниң чарлааны Чоннарның чаңгыс деминиң чылы.