Республиканың Баштыңы Владислав Ховалыгның инициативазы-биле Тывада IV делегей чергелиг сарыг шажын шуулганын белеткеп эрттирер волонтер штавын тургузуп, оларны өөредип белеткээр программаны ажылдап кылган.
Штабта регион эрге-чагыргазының, күрүне албан черлериниң, хөй-ниити организацияларының, волонтерлар отрядтарының төлээлери кирген. Штабтың кол сорулгазы – шуулганның киржикчилеринге эң таарымчалыг байдалды тургузары. Волонтерлар хемчеглерни эрттиржип, аъш-чемин ап, чурттаарынга база аай-дедир аргыжарынга байдалдарны тургусчур. Штаб ол ышкаш массалыг информация чепсектери-биле кады ажылдап, өөредилгени организастап, эки турачыларны шилижер.
Өөредилге программазы «Алдын-Херелдиң камгалакчылары: Бүгү-делегей чергелиг сарыг шажын волонтерунуң оруу» деп атты алган. Ол чаңгыс демниг команданы тургузуп, волонтерларны Тываның төөгүзүнүң, культуразының, шажын-чүдүлгезиниң дугайында билиглер-биле чепсеглеп, ол ышкаш даштыкы аалчылар-биле ажылдаарынга херек буддийжи этиканың үндезиннеринге болгаш тывынгыр-сагынгыр болурунуң арга-дуржулгаларынга өөредир. Программада лекциялар, семинарлар, тренингилер, ажыл-агыйжы оюннар, экскурсиялар, бот ажылдар кирип турар. Волонтерларның алган билиглеринге болгаш тура-чүткүлүнге даянып, сөөлгү шилилгени чорудар.
18-тен 35 харга чедир аныяктар — шуулганның темазынга ханы сонуургалдыг болгаш волонтер ажылы дамчыштыр бодунуң өзүлдезинче чүткээн студентилер, специалистер болгаш энтузиастар волонтерлар командазының кол кезээн тургузар. Ол ышкаш 45 хардан өрү назылыг башкылар, эксперттер база эки турачылап, өске-даа чугула ажылдарга дузалажыр.
Программа даштыкы аалчылар-биле ажылдаарынче угланган болгаш, колдуунда орус дылга эртер. Тыва дылды билири күзенчиг, ынчалза-даа ол албан эвес.
Добро.рф платформазынга шуулганның волонтер программазынга киржир дугайында билдириишкин киирери март 31-де доозулганын сагындыраал. Шуулганга муң ажыг кижи волонтерлаар күзелин илереткени, аңаа улуг сонуургалдың база дуза кадарынга белениниң бадыткалы.