Апрельдиң 13-тен 26-га чедир Тывада Национал төлевилелдер неделязы эртип турар. Ол үениң дургузунда Президент Владимир Путинниң эгелээшкини-биле ажылдап кылган национал төлевилелдерниң республиканың социал-экономиктиг хөгжүлдезинге болгаш чурттакчы бүрүзүнүң амыдыралынга кандыг салдар чедиргенин көргүзери-биле аңгы-аңгы хемчеглер эртер. Бо неделяда регионнуң чазаанга болуп эртер Тываның Баштыңының чанында Стратегтиг хөгжүлде болгаш национал төлевилелдер талазы-биле чөвүлелдиң хуралынга Президентиниң эгелээшкиннериниң 2025 чылга чедир күүселдезиниң түңнелдерин үндүрер.
Национал төлевилелдер неделязының бир кезээ кылдыр өөредилге албан черлери, социал албан чери, культура, спорт болгаш кадык камгалал албан черлери национал төлевилелдерниң кижилерниң амыдыралынга ниити салдарын көргүзер дээш, ажык эжиктер хүннерин, экскурсияларны, ужуражылгаларны, төгерик столдарны, консультацияларны, беседаларны болгаш мастер-класстарны эрттирер.
Национал төлевилелдер – Президент Владимир Путинниң бадылааны 2030 чылга чедир Россияның социал-экономиктиг хөгжүлдезиниң национал сорулгаларын чедип алырының кол арга-хевирлериниң бирээзи. Чурттуң экономиказын быжыглаарынче, технологтуг бот-догуннаашкынын хандырарынче, хамааты бүрүзүнүң амыдыралының шынарын бедидеринче угланган кол шиитпирлер ында кирген.
Тыва Республиканың социал-экономиктиг хөгжүлдезинге күштүг идигни национал төлевилелдерниң күүселдези берген. 2019 чылдан тура оларны боттандырып эгелээш ниитилел ужур-уткалыг түңнелдерни чедип ап, республиканың чурттакчыларының амыдырал-чуртталга байдалын элээн экижиткен.
Регион 2025 чылдан бээр 11 национал төлевилелге киржип турар, ооң иштинде 39 регион төлевилелдери кирип турар.
Президентиниң инициативазы-биле 2025 чылда республика:
- 12 эмнелге объектилерин туткан, ооң иштинде 10 фельдшер-акушер пунктузун (ФАП) болгаш 2 амбулаторияны;
- социал ужур-уткалыг 16 объектилерни, ооң иштинде 7 школаны, 5 кадык камгалал албан черлерин; 2 профессионал өөредилге бажыңнарын, 1 уруглар садын база 1 көдээ библиотеканы септеп-селээн;
- республиканың 15 автооруктарын эде чаартып, септээн.
- 30 хөй-ниити шөлдерин чаагайжыткан, а суурлар болгаш хоорайларда чаагайжыдылгалар талазы-биле мөөрейге 5 тиилекчи төлевилелди боттандырган.
2026 чылда 3 объектиде – Туранда 825 олуттуг школада, Кызылда 280 олуттуг уруглар садында, Дерзиг-Аксында 180 олуттуг бажың-интернатта тудуг ажылдары уламчылавышаан. Ийи культура албан черлеринде улуг септелгелер чоруп турар, а Шагаан-Арыгда котельнаяны тудуп эгелээн.
Ол ышкаш Кызыл-Арыг суурда ФАП тудуу, 18 социал объектилерге (5 эмнелге, 2 уруглар сады, 1 школа, 2 профессионал өөредилге чериниң оран-савазы, 4 культура албан чери, 4 аныяктар төвү) капитал септелгелер, ол ышкаш 4 оруктуң эде чаартылгазы, 31 хөй-ниити шөлдериниң чаагайжыдылгазы, таарымчалыг хоорай хүрээлеңин тургузар мөөрейге тиилээн эң эки 2 төлевилелди боттандырары планнаттынган.
Төлевилел ажыл-чорудулгазын түңнээринден аңгыда, Тываның Баштыңының чанында Чөвүлел регионда боттандырган национал төлевилелдерниң тускай сорулгаларын үре-түңнелдерин чедип алырының 2026 чылдың сорулгаларын база көөр.