«Агроинвест-2026» форумга Моолдуң делегациязының киржип келгенин барымдаалааш, Тываның Баштыңы Владислав Ховалыг Моолдуң Увс аймааның губернатору Эвэлсурен Насанбат-биле ажылчын байдалга ужурашкан. Ужуражылганың киржикчилери кожа-хелбээ күрүнелерниң регионнарының аразында дипломатчы онзагай харылзааларны моон-даа ыңай хөгжүдериниң планнарын сайгарып чугаалашкан.
Бо чылын Россия биле Моолдуң аразында дипломатчы харылзаалар тургустунганындан бээр 105 чыл болуп турар. Бо ийи чурт чүгле ниити төөгүлүг өнчү-байлаа-биле эвес, а тодаргай стратегтиг сорулгалары-биле база сырый харылзаалыг деп, демдеглээннер.
Ылаңгыя Тыва болгаш Увс аймакты таварты «Россия — Моол — Кыдат» транспорт коридорун тургузарының ажылдары чоруп турар. Бо чылын Хандагайты (Боршоо) эрттирилге пунктузунуң эде тудуушкунун доозуп, Моолду Енисей Сибириниң регионнары-биле холбаштырып турар чаа орук маршрудун Азияның орук четкизинге каттыштырары – ол угланыышкында кол сорулга болур.
Ол ышкаш ийи тала көдээ ажыл-агый адырында кады ажылдажылганы хөгжүдериниң айтырыгларын база чугаалашкан. Моолдуң делегациязы апрельдиң 9-10 хүннеринде Кызылда болуп турар «Агроинвест-2026» форумунуң үезинде, Тывада ук адырның перспективалары-биле танышкан.
Моолдуң төлээлери форумга киржип тура, программада кирген элээн каш темаларга база илеткелдерни кылган. Чижээ, чуртка агротуризмни хөгжүдериниң арга-дуржулгазы-биле үлешкеннер.
Владислав Ховалыг моол коллегазы-биле ужурашкаш, бо чайын Кызылга эртер IV делегей чергелиг буддийжи шуулганга дээрги Насанбаттың хууда киржилгези ийи таланың экономиктиг төлевилелдерин боттандырарынга база ийи регионнуң хөгжүлдезинге быжыг үндезинни бээр деп демдеглээн.