IV делегей чергелиг буддийжи форум 2026 чылда бүгү делегейден буддийжи чүдүлгениң, эртемденнерниң болгаш хөй-ниити ажылдакчыларының аразында чугааның кол шөлү апарып, ажыл-чорудалгазынче эки турачыларны хаара тудар. Хемчегни эрттиреринге дузалажыр кылдыр Калининградтан Приморьеге чедир чурттуң бүгү булуңнарындан билдириишкиннер кирип турар. Эки турачыларны dobro.ru/event/1150... адреске бүрүткеп доозарынга чедир 20 хонук арткан.
Регионнуң Аныяктар херектериниң талазы-биле яамызының медээзинден алырга, марттың 11-ге чедир Россияның 34 регионундан 377 билдириишкин киирген. Эң хөй билдириишкиннерни Республика Тыва — 206, Москва — 33, Калмык Республика — 19, Хакас Республика — 19, Новосибирск облазы — 12 база Краснодар край — 11 киирген. Эки турачыларның ортумак назы-хары – 35 хар четпес.
Шуулганның волонтер программазында янзы-бүрү угланыышкынныг ажылдар кирген: киржикчилерге болгаш делегацияларга логистика деткимчези болгаш эдертип чоруурундан эгелээш, культурлуг хемчеглерни организастаарынга болгаш очулдурукчулаарынга дузаны көргүзери. Ол ышкаш эки турачылар аразындан тускай эртемниг кордакчыларны эмчи-биле хандырылга бөлүүнче хаара тудар.
2026 чылдың март 31-ге чедир «Добро.ру» деп платформада, dobro.ru/event/1150... шөлүгге бүрүткедип ап болурун Аныяктар яамызы сагындырган. Кордакчылар бүрүткеткен соонда, эге өөредилгени болгаш шылгалдаларны эртер. Эки турачыларның түңнел даңзызын бадылааш, Аныяктар хүнүнде, июнь 27-де таныштырар.
Августуң 17-ден 20-ге чедир Тывага IV-кү делегей чергелиг сарыг шажын шуулганы болуп эртер. Ол шуулган шажыннар болгаш культуралар аразында харылзааны быжыглап, тайбың болгаш энерел сеткилдиң угланыышкыннарын нептередир ужурлуг.