Март 10-да Сербияның Зренянин хоорайга эгелээн Европаның бирги чери дээш хостуг хүреш маргылдаазынга тыва мөге Аяндай Ондар 57 кил чедир деңзиге алдын медальды чаалап алган. Тываның спортчузу Россияның чыында командазынга маргылдааның бирги алдын медалын эккелген. Республика Баштыңы Владислав Ховалыг МАХ-та бодунуң каналынга спортчунуң тиилелгези-биле байырын чедирген.
«57 кил чедир деңзиге сөөлгү салыгда Аяндай ёзулуг тыва мөзү-бүдүжүн болгаш тиилелгеже чүткүлүн көргүзүп, Азербайджандан күштүг удурланыкчы Васиф Багировту тиилээн. Бистиң спортчуларывыс төрээн чуртунуң үш өңнүг тугунуң адаанга хүрешкен, а Россияның күрүне гимнин оларның тиилелгелеринге тураскааткан. Бо дээрге анаа-ла спортчу чедиишкин эвес, а төөгүлүг чөптүг чоруктуң катап тургустунганы-дыр» - деп, регионнуң удуртукчузу демдеглээш, бо алдын медаль мөгениң келир үеде тиилелгелериниң бир дугаары апаарын күзээн.
Маргылдааның бирги хүнүнде аңгы-аңгы деңзилерге беш бөлүк медальдар дээш салыглар болган. Россияның чыында командазының составында тыва спортчу-биле кады Исмаил биле Мухамед-Тахир Ханиев алышкылар база алдын медальдарны чаалап алганнар. Магомед-Эми Эльтемиров биле Джамбулат Кизинов мөңгүн медальдарга төлептиг болганнар.
Аяндай Ондар эң баштай ачазының удуртулгазы-биле чеди харлыындан тура спорт-биле белеткенип эгелээн. Хостуг хүреш биле тыва хүреш хүрешче барып турган. Олимпийжи курлавырлар спорт школазында тренер башкы Оттук Саттың удуртулгазы-биле тиилелгеже орукту ажыткан.
«13 харлыында Тываның бирги чери дээш маргылдаага чемпионнааны, ооң бир дугаар көскү чедиишкини болган. Ооң соонда Сибирь федералдыг округтуң бирги чер дээш маргылдаага тиилээш, 14 харлыында спорт мастериниң кандидады нормативти күүсеткен. 2024 чылда спортчу «Россияның спорт мастери» деп атты алган» - деп, спорт школазы дыңнаткан.
Эрткен чылын Аяндай 23 харга чедир аныяктар аразынга Россияның бирги чери дээш чемпионатка тиилээш, делегейниң бирги чери дээш маргылдаага киржир черни чаалап алгаш, беш дугаар черни ээлээн. Ол ышкаш 2026 чылда Сербияга болур Европа чемпионадынга чурттуң чыынды командазынга киржир эргени чаалап алган. Бо маргылдаага тиилээш, делегей чергелиг спорт мастери деп атты ол алган.