Тываның Күш-ажыл болгаш социал политика яамызы MAX мессенджерде регионалдыг социал деткимче хемчеглериниң дугайында медээлерлиг чат-ботту ажылдаткан. Чаа сервис чурттакчыларга амгы чиигелделерниң дугайында тайылбырлап, чогуур документилерни чурагайлыг хевирге долдурарынга дузалаар.
Республиканың Баштыңы Владислав Ховалыг чат-боттуң ажылдап эгелээнин дыңнаткан. Регионалдыг эрге-чагырганың кол угланыышкыны - социал деткимчениң чедингир болгаш таарымчалыг аргаларын сайзыраңгайжыдары деп, ол чугаалаан.
«Амыдыралдың берге байдалынга таварышкан хамаатыларывыска болгаш ажы-төлдүг өг-бүлелерге социал деткимче – бистиң ажылывыстың кол сорулгаларының бирээзи. Бөгүнде Тывада 30 ажыг аңгы-аңгы деткимче хемчеглери ажылдап турар. Ачы-дузаны алыры чедингир болур ужурлуг. Тываның Күш-ажыл болгаш социал политика яамызының эптиг чат-ботту ажылдап кылыр дээн эгелээшкинин деткээн мен. Бо дээрге чурттакчы бүрүзүнге хамаарыштыр кандыг деткимче хемчеглери барын билип ап болур ажыктыг дептержигеш-тир» - деп, регионнуң удуртукчузу дыңнаткан.
Тываның Баштыңының Айыткалын күүселдери-биле, республикада тускай шериг операциязының киржикчилеринге «чаңгыс соңга» дамчыштыр ачы-дуза чедирилгези уламчылап турар. Ам чүгле чаңгыс билдириишкинни киириптерге, ол аңаа хамаарышкан шупту албан черлеринче ол-ла дораан чоруй баар.
Социал ачы-дузаларны чурагайжыдарынче онза кичээнгейни угландырган. MAX мессенджерни ажыглап тургаш, хамаатылар хөй ажы-төлдүг өг-бүлениң, пенсионер азы инвалид кижиниң чурагайлыг шынзыдылгазын кылдырып ап болур. Ону кылдырарда, Госуслуги порталынга чөпшээрелин айтыр, ооң соонда эрге-байдалы бадыткаттына бээрге, саазын документилер чокка телефонундан QR-кодту дорт ажыглап тургаш, чиигелделерни ап болур.
Чат-ботту max.ru/mintrudrtbot айтыгдан тып ап болур.