Тываның Баштыңы Владислав Ховалыг республиканың херээжен чонунга март 8-те байырны чедирген. Республиканың Баштыңы албан езузунуң телеграмм база MAX мессенджер таварыштыр ону бижээн дыңнаткан. Частың бо байырлалын республика чогаадыкчы күш-ажылдың болгаш өг-бүле ыдыктарының чылында демдеглеп турары онзагай деп ол байыр чедириишкининде демдеглээн.
«Бөгүнгү бо кайгамчыктыг байырлал-биле бистиң энерелдиг энелеривиске, авыралдыг аваларывыска, ынак эживиске, чараш угбаларывыска, чаптанчыг кыстарывыска сеткилимниң ханызындан байыр чедирип тур мен – деп, регионнуң баштыңы демдеглээн. – Аал-ораныңарга аянныг байдалды, быжыг ынакшылды, шынчы чорукту тургузуп, аныяк салгалды өгбелеривистиң чаңчылдарын хүндүлээр кылдыр кижизидип чоруур силер».
Владислав Ховалыг республикада херээжен чон төрээн чериниң хөгжүлдезинге үнелеп четпес үлүг-хуузун киирип чоруурун демдеглээн. Кадык камгалал, өөредилге, культура, көдээ ажыл-агый, бизнес болгаш күрүне эргелеп-башкарылгазында чедиишкиннерни чедип ап турар. Херээжен чоннуң харыысалгазы болгаш профессионал мергежили – регионнуң сайзырап чечектелириниң кол дөзү деп ол санаан.
Тываның Баштыңы тускай шериг операциязында киржип чоруур шериг албанныгларның аваларынга, эжинге, угбаларынга ханы хүндүткел-биле өөрүп четтиргенин илереткен. «Силерниң бүзүрелиңер болгаш туруштуг чорууңар бистиң дайынчыларывыска эң-не быжыг даянгыыш болуп турар» -деп, ол демдеглээн.
Владислав Ховалыг быжыг кадыкшылды, эгээртинмес күштү, өг-бүлелеринге чечектелиишкинни болгаш бүгү-ле эки ажыл-херектеринерге чаа-чаа чедиишкиннерни күзээн.