Тываның Баштыңы «Ареал» компанияның спонсор деткимчези-биле Тожу кожууннуң Тоора-Хем суурунга спорт зал тударын дыңнаткан. Бо чүүл республиканың ыраккы болгаш чедери берге муниципалдыг тургузугларның бирээзиниң чурттакчыларынга спорт-биле өңнүктежиринге таарымчалыг байдалдарны тургузар.
Владислав Ховалыг медээни дыңнадып тура, амгы үениң спортчу объектилерин тудары республиканың чурттакчыларының хөйү-биле дилээн чүүлдериниң бирээзи дээрзин демдеглээн. Чижээ, Тожу кожуунда массалыы-биле баар спорт залы чок. Кожууннуң удуртулгазы регионнуң Баштыңы-биле ужуражып тура, ол айтырыгны көдүрген.
Республиканың эрге-чагыргазы спортчу инфраструктураны чаартыр болгаш хөгжүдер айтырыгны чоорту, ооң иштинде инвесторларның саң-хөө деткимчези-биле шиитпирлеп турар.
«Эльбрусметалл-Литий» компанияның деткимчези-биле эрткен чылын Эрзин суурга күш-культура-спорт залын тутканы чедиишкинниг төлевилелдерниң бирээзи болур. Бөгүн ол объекти бүгү Эрзин кожуунда спортчу хемчеглерниң төвү апарган. Ол ышкаш республиканың өске-даа кожууннарының бичии мөгелеринге «Эзирлер уязы» деп бичежек спортчу залдарны тударын инвестор деткип турган.
Владислав Ховалыг бодунуң дыңнадыында регионнуң хөгжүлдезинге үлүг-хуузун киирип чорууру болгаш социал харыысалгазы дээш инвесторларга өөрүп четтиргенин илереткен.
Эрткен чылын «Ареал» бөлүү Тываның Эрзин кожуунда «Тастыг» чыдынында литий дустарын бүдүрер гидрометаллургия заводун дөзевилээр ажылче киргенин сагындыраал.