Тывадан 300 ажыг кижи дагдыныкчы болур күзелин илередип, бүгү-российжи «Деңзигүүрлүгг кижи» төлевилелге киржири-биле Добро.рф база Значимый.наставник.рф платформаларда бүрүткеткен. Тыва Республиканың Чазааның Даргазының оралакчызы Орлан Сарыглар бодунуң блогунда ооң дугайында дыңнаткан.
Эрткен неделяда Орлан Денек-ооловичиниң удуртканы Тыва Республиканың Чазааның чанында назы четпээннер херектериниң талазы-биле ведомстволар аразының комиссиязының хуралынга төлевилелде регионнуң киржилгезиниң амгы түңнелдерин дыңнаткан.
Берген медээлерден алырга, республикада 352 дагныкчы бүрүткеткен, оларның 135-и Добро.рф платформазында тускай өөредилгени чедиишкинниг эрткен. 77 кандидат албан кылыр чаданың бирээзи – психологтуг консультацияны эрткен. Оларның аразындан 36 кижини дагдыныкчы кылдыр томуйлаарынга сүмелээн.
«Дагдыныкчы дээрге, чанында анаа-ла улуг кижи болурундан аңгыда, а аныяк өскенге бодунуң үлегер-чижээ, деткимчези, бүзүрели болгаш деткимчези-биле доктаамал үдеп чоруур кижи-дир» - деп, Орлан Сарыглар демдеглээн.
«Деңзигүүрлүг кижи» - Россияның Чырыдыышкын яамызы болгаш Россияның Аныяктар херектериниң федералдыг агентилелиниң деткимчези-биле «Баштайгыларның шимчээшкини» биле «Добро.рф» платформаның кады боттандырган бүгү-российжи төлевилели-дир. Төлевилелдиң кол сорулгазы – амыдыралдың берге байдалынга таварышкан өскүс болгаш элээди уругларга дагдыныкчы ажыл системазын тургузары. Дагдыныкчы кижи уругга хостуг үезин организастаарынга, эш-өөрү-биле харылзаа тударынга, сагыжынга кирер сонуургалын тып алырынга, уругнуң хууда сайзыралынга үлүг-хуузун киирип, дузалажыр.
Дагдыныкчы болур дизе, идепкейлиг хамааты туруштуг, бодунуң арга-дуржулгазын, арга-мергежилин, билиглерин үлежиринге белен, уруг-биле кезээде кады болуп, үени эрттиреринге белен 18 хардан өрү назылыг Россия Федерациязының хамаатызы болур ужурлуг. Дагдыныкчыже кордакчылар тускай өөредилгени эртер: «Баштайгыларның шимчээшкини» тус чер база регионалдыг салбырларның баазазынга онлайн өөредилген ичедиишкинниг дооскан соонда сертификатты алыр, ол ышкаш боду тускай белеткелди — психолог-биле дагдыныкчызының консультациязын база бөлүк аайы-биле тренингини эртер.
«Тываның чурттакчыларын төлевилелге киржиринче чалап тур бис. Силерниң киржилгеңер бир-ле кижиниң чуртталгазын эки талаже өскертип болур» - деп, Орлан Сарыглар республиканың чурттакчыларынга чугаалаан.
Дагдыныкчы болуксаан кижилер Значимый.наставник.рф сайтыга бүрүткедип алыр.