Март 1-де уран чүүлдүң шылгараңгай ажылдакчызы , РСФСР-ниң алдарлыг артизи Виктор Шогжапович Көк-оол 120 харлап турар. Ооң ады республиканың культурлуг төөгүзүнде онзагай черни ээлеп, Тывага профессионал театр уран чүүлүнүң тургустунуушкуну-биле сырый холбашкан.
Республика Баштыңы Владислав Ховалыг бо уттундурбас болуушкун-биле республиканың чурттакчыларынга байыр чедирип, Виктор Көк-оолдуң Тываның культурлуг өнчү салгалынга киирген улуг үлүг-хуузун онзалап демдеглээн.
«Бодунуң салым-чаяаны болгаш ынакшылы-биле чогаадыкчы ажылдың чаа салгалынга камныг сайзырадыр ужурлуг ужур-чаңчылдарны эгезин салган» — деп, регионнуң удуртукчузу демдеглээн.
Виктор Көк-оол аттыг Тыва Республиканың Национал хөгжүм-шии театры бо чылын 90 чыл оюн демдеглеп турары анаа эвес. Мастерниң адын эдилээн республиканың кол культура албан чери бирги улусчу оюн-көргүзүүнден эгелээш, бүгү-россия болгаш делегей деңнелинге бедик үнелелди ап, сайзыраан.
Виктор Шогжапович Көк-оолду тыва драманың болгаш профессионал театрның үндезилекчилериниң бирээзи деп санап турар. Театрның чогаадыкчы бөлүүн тургузарынга, ооң репертуарын чогаадырынга, тыва сцена культуразын сайзырадырынга идепкейлиг киришкен. Чоннуң төөгүзүн болгаш ужур-чаңчылдарын илереткен тыва дылга баштайгы драма чогаалдарын чогаатканы, национал сценаның уран-чечен дылын хевирлээни, чогаадыкчы кадрларны кижизиткени — ооң көскү чедиишкиннериниң чамдыызы.
РСФСР-ниң алдарлыг артизи деп хүндүлүг атты тывысканы - ооң ачы-хавыяазынга улуг үнелел. Виктор Көк-оолдуң арттырып каан өнчүзү амгы үениң уран чүүл ажылдакчыларынга хей-аътты берип, а бо юбилейлиг бо хүн республиканың культурлуг ужур-чаңчылдарын кадагалап база көвүдедириниң чугулазын демдеглеп турар.