Тываның Баштыңының Владислав Ховалыгның бодалы-биле алырга, төрээн черинге кызыгаар чок бараан болурунуң төлептиг үлегерин көргүзүп чоруур Тыва Республиканың ордениниң эдилекчизи, Россияның көдээ ажыл-агыйының алдарлыг ажылдакчызы Өшкү-Саар Аракчааевна Ооржакка төрүттүнген хүнү-биле байыр чедирген.
«Өшкү-Саар Аракчааевнаның ады бистиң республиканың агроүлетпүр комплекизиниң хөгжүлдези-биле сырый тудуш. Ооң хөй чылдарда ак сеткилдиг күш-ажылы, мерген угааны, шилип алган ажыл-херээнге бердингени Тываның чурттакчыларының аразынга төлептиг алдар-хүндүнү болгаш ханы хүндүткелди чаалап алган. Ооң шыңгыы мөзү-бүдүжүнүң болгаш сагыш-сеткилиниң кайгамчык үлегеринге бөгүн шупту деңнежиксеп чоруур бис» - деп, Владислав Ховалыг бижээн.
2001 чылдан бээр «Мөген-Бүрен» көдээ ажыл-агый бүдүрүлгезин чедиишкинниг башкарып, төрээн Мөңгүн-Тайга кожууннуң хөгжүлдезинге Өшкү-Саар Аракчааевнаның киирген үлүг-хуузун республика Баштыңы онзалап демдеглээн.
Эде тургузуушкун чылдарында хөй-ле көдээ ажыл-агый бүдүрүлгелери хагдынып турда, ол амгы үеде мал ажыл-агыйында эки бүдүрүкчү көргүзүглери-биле шылгарап чоруур төрээн ажыл-агыйын кадагалап арттырып шыдаан.
Өшкү-Саар Аракчаевнаның удуртулгазы-биле бүдүрүлге сүт, дүк болбаазырадыр, сарлык эъдин хеңмелээр мини-цехтер ажыттынган, кожууннуң болгаш республиканың чурттакчы чонун бодунуң сүт болгаш эът продукциязы-биле хандырып турар.
Назы-хары улгаткан-даа болза, Өшкү-Саар Аракчааевна хөй-ниити ажыл-херээнге идепкейлиг киржип, тыва өг-бүлениң үндезин үнелиг чүүлдери — хөй ажы-төлдүг болгаш ажылгыр-кежээ чорукту суртаалдап чоруур.
Владислав Ховалыг бүгү тыва чоннуң өмүнээзинден хоочунга быжыг кадыкшылды, узун назынны күзээн.