Республикага дүүн чагган хар чамдык черлерде 15 см чеде берген. Орук албаннары агаар-бойдустуң берге байдалын-даа көрбейн, оруктарны хардан арыглап, дайгыр черлерде элезин-сайны төп, штаттыг чурумга ажылдаан. «Тываавтоорук» күрүнениң казна албан чери 2 муң километр ажыг орук участоктарында ажылдап, арт кыры черлерге чоруурунга таарымчалыг байдалды тургусканын дыңнаткан. 16 орук-тудуг организацияларының130 орук ажылчыннары болгаш 70 ажыг хар арыглаар техниказы хар аштаарынче үнген.
Улуг арттарда оруктар таарымчалыг дээрзин орукчулар дыңнаткан. Орук техниказы чамдык черлерниң харын болгаш хөртүктерин үстүрүп, арыглаан. Дараазында участоктарда орук ажылдары чоруттунган:
- Барыын-Хемчик кожуунда «Чолалыг» арт кыры;
- Барыын-Хемчик кожуунда «Көдүрер-Даш» арт;
- «Хандагайты – Мугур-Аксы» автоорукта «Калчан» арт;
- Өвүр кожуунда «Тээли» арт;
- Чеди-Хөл кожуунда «Северный» арт;
- Тес-Хем кожуунда «Калдак-Хамар» арт;
- «Хандагайты – Мугур-Аксы» автоорукта «Чолдак - Орук» арт;
- «Абакан – Ак-Довурак» автоорукта «Сотый» арт;
- Тожу кожуунда «102 км» арт.
«Бояровка – Тоора-Хем» оруктуң 71-ги, 75-ки база 111-ги километринде чайындылаан, илчирбе чок болгаш чайгы дугуйлуг чорууру хоруглуг.
«Бүрен-Аксы – Элегес-Аксы – Кунгуртуг» кышкы оруктуң байдалы эки.
«Бельбей» (10 тонна), «Эйлиг-Хем» (5 тонна) база Бүрен-Аксы (20 тонна)» дош кежиглеп доктааттынган чүъктүг эртип болур.
Тываның Орук-транспорт яамызы бо чоокку хонуктарда республиканың чамдык черлеринге хар чаап, соорун баш бурунгаар дыңнаткан. Соңгу-барыын чүктен хаттың дүргени секундада 15-18 метр чедир күштелип, даглыг черлерге 23 метр чедип, шуурганнаар, оруктарга дожаңнаар.
Орукка машина үрелип, онза байдалдар тургустунуп келзе, «Тываавтоорук» күрүнениң казна албан чериниң диспетчер албанында 89293580911 дугаарлыг телефон-биле харылзажып болур. «Енисей» федералдыг автоорук талазы-биле дыңнадыгны «Енисей орук эргелели» федералдыг казна албан чериниң дараазында телефонунче дыңнадыг: 8(391)265-01-129, мобильдиг телефону +79632521160.