Тывада Масленица неделязының сөөлгү хүнүн чаңчыл ёзугаар, улусчу байырлалдар-биле демдеглеп эрттирип турар – чон кышты өөрүшкүлүг үдеп, үр манааны часты уткуурлар. Бо чылын байырлалдың кол кезээ Чөөн-Хемчик кожууннуң төвүнде Чадаана хоорайга болуп эрткен. Орус культура төвүнден делегация, Россияның чоннарының ассамблеязының регионалдыг салбыры болгаш Националдар херектериниң талазы-биле агентилел тус черниң чурттакчыларынга солун байырлалды сөңнээр дээш, үнүүшкүннү кылган. Бо улуг хемчег эрткен чылын эгелээн «Тывада орус байырлалдар» төлевилелдиң бир кезээ болур.
«Православ чүдүкчүлерге бо улуг посттуң эгелээни ханы уткалыг. Ынчалза-даа бистиң хөй националдыг Тывавыста Шагаа ышкаш, Масленица база чоннуң байырлалы. Частың чаартылгазынга шажын-чүдүлге база культурадан хамаанчокка, кады өөрүп, чаагай күзелдерни үлежип, бот-боттарывыстан өршээлди дилеп, шупту хомудалдарны арттырып кааш, бот-боттарывыстан өршээлди дилеп турар бис» - деп, Владислав Ховалыг МАХ национал мессенджерде бодунуң каналынга чаңгыс чер чурттугларынга байырлал-биле байыр чедиргенин бижээн.
Эрткен чылын биче хоорайларга болгаш төөгүлүг чурттакчылыг черлерге таарымчалыг хоорай хүрээлелин тургузар дээн эң эки төлевилелдер аразынга тиилээн Чадаанада хоорайда «Тос муниципалдыг тургузуглар төвү» деп культура болгаш дыштанылганың хөй-ниити шөлүнге байырлалды эрттирген. Кожуунга эрткен байырлалга шупту суурлардан аалчылар келген.
Орус культура төвүнүң ажылдакчылары тус черниң чурттакчыларынга «Калбак масленица» деп театржыткан программаны белеткээн. «Орус өреге» деп өңгүр шөлге болган хемчеглер аалчыларны чаагай блинчиктер болгаш орус самовардан шайы-биле хүндүлеп, база «Хөглүг оюннар» деп шөлге улусчу оюннарга болгаш шенелделерге аваангыр, шимченгир чоруун шенешкен. Масленица мөөрейлеринде чагы бажы үнери хөйнү хаара туткан.
Кыштың эрткенин болгаш ооң бүгү-ле түрегделин илереткен Масленицаның дүрзүзүн өрттедир ёзулал-биле байырлал адакталган. Эрги шагда өрттедипкен саваңдан дүрзүнүң хүлүн чер дүжүттүг болзун дээш, шөлдерже чажыптар турган. Ол ёзулал кыштың чорутканын болгаш частың келгенин, бойдустуң оттуушкунун, чаа амыдыралдың эгелээнин илередип турар.
Кызылда Арбат шөлүнде байырлал эртенги шакта эгелээн. Орус улустуң хептерин кеткен Аныяк көрүкчүлер театрының артистери, төпчүткен библиотека системазының библиотекарьлары скоморохтар кылдыр хуулуп алгаш, хөглүг оюн-көргүзүгнү бараалгаткан. Уруглар-даа, улуг улус-даа оюннарга киришкен. Ол ышкаш Аныяктар сесерлиинге эрткен кол байырлал хемчеглерни хоорайжыларны болгаш аалчыларны ойнрадып, хөглеткен.
Масленица неделязының сөөлгү хүнү өршээлдиг улуг-хүнде кижилер эрткен чылда буруулуг чүүлдери дээш бот-боттарындан өршээлди дилээннер. Ол хүн кижилер ам 40 хонук дургузунда шыңгыы чурум-биле чемненирин сагыыр езулал мурнунда амданныг чемнерни чооглааннар. Байырлалдан арткан аъш-чем үрелбезин дээш, келген чонга чонга үлээн. Оон ыңай бо хүнде мага-ботту, сагыш-сеткилди арыглап, чунар-бажыңнаар чаңчыл база бар. Бустаныры бачыттардан болгаш аарыглардан арыгланырынга дузалаар деп бүзүрел бар.