Ада-чурт камгалакчызының хүнүнде Тыва Республиканың Чазааның кежигүннери Кызылдың Тиилелге шөлүнге байырлыг митингиге киришкеннер. Киржикчилер төрээн чурту дээш маадырлыы-биле тулчуп чораан дайынчыларга тураскааткан сактыышкынның минутазын кылып, Билдинмес дайынчыга тураскаалдың чанында Мөңге оттуң баарынга боодал чечектерни салган.
Тыва Республика талазы-биле кол федералдыг инспектор Александр Вавилихин, Тыва Республиканың Дээди Хуралының (парламентизиниң) депутаттары, эрге-хоойлу камгалаар территориалдыг черлерниң, регион яамыларының болгаш ведомстволарының удуртукчулары, ол ышкаш «Дайынчы акы-дуңмалышкы», «Десантниктер эвилели» хөй-ниити организацияларының регионалдыг салбырларының төлээлери, Афганистан хоочуннарының эвилели база Кызылдың президентиниң кадет училищезиниң, Тываның кадет корпузунуң хууда составы байрылыг хемчегге киришкен. Тыва Республиканың шериг комиссары Евгений Терехов байырлыг езулалды удуртуп эрттирген.
Февральдың 23-те Ада-чурт камгалакчызының хүнү – күрүне байырлалының онзагай ужур-утказын митингиниң киржикчилери демдеглээннер. Кандыг-даа үеде Россияда шериг мергежил патриотчу чорук болгаш алдар-ат-биле холбаалыг. Ада-чуртту камгалаар ыдыктыг хүлээлге эр кижилерге, Ада-чурттуң дайынчыларынга, Россияның дайынчыларынга онза алдар-хүндү кылдыр санаттынар.
Ада-чуртту камгалаары хамааты бүрүзүнүң ыдыктыг хүлээлгези деп демдеглээн. Бодунуң черинге, Төрээн чуртунга, авазынга ынакшылы, бодунуң чуртунга чоргаарал, ону алдаржыдары болгаш камгалаары – бистиң чуртувустуң бүгү хамаатыларының ниити хүлээлгези.
Россияның дайынчы алдар-ады салгалдан салгалче дамчып чоруур күштүг. Ада-чурттуң болгаш чоннуң хосталгазы дээш амы-тынын берген эки турачылар, интернационалисчи дайынчылар – боттарының кырган-ачалары болгаш өгбелериниң маадырлыг чоруунуң эң-не үлегер-чижээнге кижизиттинген ада-чурт камгалакчылары — Тывадан оолдарывыс бөгүн тускай шериг операциязының тулчуушкун шөлдеринде Россияның Чепсектиг Күштериниң одуруунда хүлээлгезин күүседип турар.
Кутузов орденниг гвардейжи 55-ки мото-адыгжы бригадазының шериг оркестриниң Расул Гамзатовтуң «Журавли» деп тоолчургу ырызының күүселдези-биле митингиниң киржикчилери билдинмес солдаттың тураскаалынга чечектерни салган. Чечек салыр езулал үезинде Кутузов орденниг гвардейжи 55-ки мото-адыгжы бригадазының салют бөлүү автоматтан үш катап дааштаашкынны кылган.