Тываның Баштыңы Владислав Ховалыг Ада-чурт камгалакчызының хүнү-биле республиканың чурттакчыларынга байырны чедирген. Февральдың 23 – чурттуң амыр-тайбыңын болгаш айыыл чок чоруун камгалап турар бүгү кижилерге хүндүлелди илередип турар хүн деп, ол демдеглээн. «Өгбелеривистиң маадырлыг чоруунуң мөгейип, амгы салгалдың камгалакчыларын чоргаарланып көрүп чор бис. Бөгүн бистиң дайынчыларывыс, Тываның оолдары, Россияның бот-догуннаашкынын болгаш келир үезин камгалап, ёзулуг эр сорукту чорукту көргүзүп чоруурлар» - деп, Владислав Ховалыг МАХ-та бодунуң каналында бижээн.
Байырлал хүнүнде федералдыг яамыларның болгаш ведомстволарның удуртукчуларындан, ол ышкаш Россияның өске-даа регионнарының удуртукчуларындан байыр чедириишкининиң телеграммалары чаңчыл езугаар келгенин республиканың Баштыңы дыңнаткан.
Владислав Ховалыг Россияның Чазааның Даргазының бирги оралакчызы Денис Мантуровтуң телеграммазын бодунуң каналынга парлаан.
«Бо онзагай хүнде Төрээн чуртту камгалап тура мөчээн маадырларның эрес-дидим, маадырлыг чоруунга хүндүткелди илередип, бөгүн чуртунга бараан болуп чоруур бүгү камгалакчыларга сеткиливис ханызындан өөрүп четтирдивис. Бо байырлал профессионал адырда база анаа-даа амыдыралда чүгле дайынчы шылгаралды эвес, а патриотчу чорукту, харыысалганы, бүзүрелди, хүлээлгезинге бердинген чорук дээн ышкаш шынарларны илередип турар. Ооң мурнунда ышкаш, бөгүн база амыр-тайбыңны болгаш күрүнениң күчү-күжүн кадагалап арттырары фронтунуң болгаш тылдың чаңгыс демниг чоруундан, чурттуң камгалалында болгаш ооң экономиказын, үлетпүрүн, социал турум чоруун быжыктырып турар кижилерниң демниг ажылындан хамааржыр. Силерге быжыг кадыкшылды, бедик хей-аътты, Ада-чурттуң чаагай чоруу дээш чаа-чаа чедиишкиннерни күзедим!» - деп телеграммада бижээн.
Тываның бүгү чурттакчыларының өмүнээзинден Владислав Ховалыг федералдыг удуртукчуларга болгаш коллегаларынга чылыг сөстери, деткимчези дээш, чурттуң камгалал күжүн быжыглаарынга республиканың үлүг-хуузун үнелээни дээш өөрүп четтиргенин илереткен.
2002 чылдан эгелеп февраль 23 дыштаныр хүн апарган. Бөгүн бүгү Тывада эрес-дидим чоруктуң болгаш эр соруктуң демдээ апарган бо чугула хүнге тураскааткан аңгы-аңгы патриотчу хемчеглер эртип турар.