Тываның Баштыңы Владислав Ховалыгның даалгазы-биле, ооң тускай шериг операциязының талазы-биле тускай төлээзи Тимур Куулар Кутузов орденниг гвардейжи 55-ки мото-адыгжы бригаданың дайынчыларынга радиоэлектроннуг демиселге ажыглаар дроннар болгаш дериг-херекселдерни чедирген.
«Хүлээткен техниктиг дериг-херекселдер дайынчы даалгалар күүседиринге дузалаар. Тыва фронтуга бүгү талалыг деткимчени көргүзерин уламчылап, бистиң оолдарны камгалаар база оларга дузалажыр дээш бүгү-ле аргаларны кылып, гуманитарлыг дуза чүъгүн чаңгыс сорулга-биле чыып турар бис» - деп, Владислав Ховалыг чүък чеде бергенин дыңнаткан.
Кутузов орденниг гвардейжи 55-ки мото-адыгжы бригаданың шериг албанныглары ачы-буян чүъгүн алгаш, гуманитарлыг ачы-дуза дээш республиканың Баштыңынга четтиргенин илередип, Тываның чурттакчыларынга Ай санаашкыны-биле Чаа чыл таварыштыр, а тылда ажылдап турар эр кижилерге Ада-чурт камгалакчызының хүнү-биле байыр чедирген видеону тырттырып алгаш, харыы кылдыр чорутканнар.
Тываның Баштыңы Владислав Ховалыгның даалгазы-биле ТШО айтырыгларының талазы-биле тускай төлээ Тимур Куулар амгы үеде дайынчы хөделиишкиннер девискээринде чоруп турарын сагындыраал. Шериг кезектериниң турар черлеринге дайынчыларның чагыы-биле саткан техниктиг дериг-херекселди хүлээдип турар.