Томск хоорайга «Хөм бөмбүк – школаның футбол лигазы» деп бүгү-российжи футбол маргылдаазының регионнар аразының чадазы доозулган. Сибирь федералдыг округтан 69 команда чемпион ат дээш ойнаан. Тываның элээди спортчулары тергиин оюннарны көргүзүп, командалыг-даа, хууда-даа оюнга элээн каш шаңналдарны чаалап алганнар. Республиканың Баштыңы Владислав Ховалыг ойнакчыларга чедиишкинниг киржилгези-биле байырны чедиргеш, оларның тиилелгези регионнуң улуг спортчу арга-шинээн база катап бадыткаанын демдеглээн.
«Аксы-Барлыктан уруглар мөңгүн медальды, а Шагаан-Арыгның оолдары ийи чыл улаштыр Сибирь командаларының аразынга хүлер медальды чаалап ап, боттарының шыырак деңнелин бадыткаан. Ылаңгыя бистиң ойнакчыларывыс чүгле командалыг оюннардан өске маргылдааларга база шылгарааны өөрүнчүг-дүр. Шагаан-Арыгдан Александр Седип маргылдааның тулган ойнакчызы, а Аксы-Барлыктан Декабрина Хомушку тергиин халдакчы деп аттарга төлептиг болган. Ол дээрге оларның күш-ажылының, ада-иелерниң деткимчезиниң база тренерлеривистиң арга-мергежилиниң кады ажылдаанының түңнели-дир» - деп, республика баштыңы бодунуң МАХ каналынга бижээн.
Барыын-Хемчик кожууннуң Аксы-Барлык суурдан уруглар командазы бо чылдың январьда элээдилер аразынга болуп эрткен мини-футбол маргылдаазының регионалдыг чадазынга тиилээш, регионнар аразының маргылдааларынга Тываның адын камгалап киржир эргени чаалап алганнар. Бо команда республика чергелиг оюннарның дөрт дакпыр чемпиону. Команданың тренерлери – Аксы-Барлык школазындан күш-культура башкылары Күжүгет Эртине Владимирович биле Соян Алиса Анатольевна.
Шагаан-Арыгның 2 дугаар школазының элээди оолдар командазының ойнакчызы Александр Седип ийи чыл улаштыр “шыырак ойнакчы” деп атка төлептиг болганын демдеглезе чогуур. Шагаан-Арыгның командазы эрткен чылын бүгү-российжи мини-футбол маргылдаазының регионнар аразының чадазынга шыырак оюнун көргүзүп, хүндүткелдиг үшкү черни чаалап алганнар. Команданың тренери Тумат Орлан Орлан-оолович, а ооң удуртукчузу Кызыл-оол Аржаана Константиновна.
Владислав Ховалыг оолдар, уругларның чедиишкиннерин демдеглеп тура, республика чурттакчы чоннуң ортузунга кадык амыдыралды эдереринге бүгү-ле таарымчалыг байдалдарны тургузар дээш ам-даа ажылдарны чорударын демдеглээн.
Бо чылын Тываның найсылалында «Вавилин ээтпээ» микрорайонга спорт залды, «Спутник» микрорайонунга эштир бассейнни, «ЦСКА Тыва» школазынга универсалдыг спорт залын тудар.