Тыва Республиканың сарыг шажынчыларының баштыңы Камба-лама Гелоң Лоден Шераб (Уржанай Долаан Александрович) күрүне баштыңындан байыр чедириишкинин алган. Россияның Президентизиниң телеграммазында Тываның Камба-Ламазынга, ооң удуртуп турар сангхазынга, Тыва Республиканың бүгү-ле буддистеринге Ай санаашкыны-биле чаа чылды уткаан байырлал – Шагаа таварыштыр байырын чедирген.
Чурттуң Президентизи Гелонг Лоден Шерабка кадыкшылды болгаш ажыл-херээнге чедиишкиннерни күзээн.
Ооң мурнунда Тываның Баштыңы Владислав Ховалыг бодунуң МАХ каналынга буддийжи регионнарның сүлде-сүзүүнүң үнелиг чүүлдеринче кичээнгейни салып, деткип турары дээш Президентиге өөрүп четтиргенин илереткен.
«Буддийжи организациялар – өг-бүлениң болгаш езу-чаңчылдарның күчүлүг даянгыыжы-дыр деп күрүне баштыңы шын демдеглээн - деп, Тываның Баштыңы бижээн. - Биске, Тывада, бо дээрге кол чүүл-дүр. Бүзүрел салгалдарны каттыштырып, хүндүткелге өөредип, мурнуку одуругда дайынчыларывыска күштү берип турарын көрүп чор бис. Чурттуң сүлде-сүзүүнүң чаңгыс демин быжыглаарынга бистиң үлүг-хуувусту бедик деңнелге демдеглээни өөрүнчүг-дүр».