Тываның Баштыңы база Тыва Республиканың Чазааның кежигүннери ай санаашкыны-биле Чаа чыл – Шагааның дүшкениниң «Сан салыр» ёзулалынга чаңчыл езугаар киришкеннер. Бо чылын Кызылда сес аңгы черге саңны салган. Республиканың муң-муң чурттакчылары чылдың-на саң салыр ёзулалче барып, үнген чылда бүгү-ле чүүлдерге чүгле экини күзээн дилеглерни оран-таңды ээлеринден дилеп турар.
Республика Баштыңы Владислав Ховалыг Шагаа байырлалының улусчу езу-чаңчылдарын кадагалап арттырарының онзагай ужур-утказын демдеглээн: «Бистиң шуптувуска Шагаа дээрге анаа-ла байырлал эвес-тир. Ол дээрге ажы-төлге болгаш келир салгалгалдарга албан-биле дамчыдар ужурлуг эрткен үе-биле харылзаага, өгбелерниң ужур-чаңчылдарынга улуг мөгейиг-дир» -деп, республиканың удуртукчузу демдеглээн.
Улуг-Хемниң эгезин алган хем белдириниң эриинде Национал паркка республиканың хамнар ниитилелдериниң төлээлери ыдыктыг саңны эртенгиниң 5 шакта кывысканнар. А эртенгиниң 6 шакта, өске шөлдерге саң салыр ёзулал эгелеп, сарыг шажын номналдары уламчылаан.
«Кадарчы» тураскаалының чанынга база «Дөгээ» дааның эдээнге «Саң салыр» езулал эң хөй чонну чыгган. Даң хавыяазында муң-муң эр кижилер «ак чемин» азы «чем дээжизин» чер болгаш дээрниң ээлеринге, өгбелериниң сүнезиннеринге өргүл кылдыр сөңнээннер.
Чон чыглып турар аразында, эр кижилер тевек тевер дээн ышкаш тыва национал оюннарга идепкейлиг киришкеннер. Шашки, шыдыраага, кажыкка оюннарны чылыг майгын иштинге аңгы организастаан.
Бо чылын саң салыр мурнунда «Домнаашкын» деп ёзулалды бир дугаар эрттиргени солун. Эки күзээшкиннерлиг йөрээлдерни салып тура, дөрт чүкче аткан согуннуң үжүн өгнүң хараачазындан үндүр аткан. Чадан аткан согун бүрүзүнде чүгле чаагай күзээшкиннерни салып, «Курай! Курай!» деп чалбарган.
Хемчегниң эрттирикчизи Тыва Республиканың Улустуң хөөмейжизи Андрей Монгуш чыылган чонга ёзулалдың ужур-утказын сонуургаткан. Чадан аткан согуннар арыглаар күчү-күштүг, эрткен чылдың бүгү-ле багай чүүлдерин алгаш баргаш, кижилерниң хей-аъдын бедидер деп тайылбырлаан.
«Домнаашкын» ёзулалының соонда, киржикчилер субурганга чаламаларны баглап, буянныг йөрээлдерни болгаш чалбарыгларны номчуп тургаш, ону үш катап долганган.
Сарыг шажын ламалары үнүп келген От Аът чылы өг-бүлелеринге, арбын көвей чонга буянын сөңнеп, аас-кежикти, чаагай чорукту, төрээн черинге амыр-тайбыңны, оожургалды эккээр болзун деп мөргүлдү номчааннар.
Тыва Республиканың Камбы-ламазы Гелонг Лоден Шераб баштаан лама башкылар база саң салыр езулалдың шупту киржикчилери амыр-тайбың дүжүп, тускай шериг операциязының шупту киржикчилери аал-орарынче онча-менди дүрген чанып кээрин От чаяакчыдан дилээн.
Ыдыктыг езулалдың киржикчилери оттуң изиг чалыны бак чүүлдерни чок кылып, багай бодалдарны узуткап, чаа чырык эгелээшкиннерге күчү-күштү бээринге бүзүрелин илереткен.
Саңның сөөлгү көстери хып турда, даң хаяазы үнүп келген. Хүннүң баштайгы херелдери чаа чылдың келгенин чайырлап, езулалдың киржикчилер бот-ботарынга байырны чедирип, салгалдарның уламчызын, улуг кижилерге хүндүткелди илередип, чолукшааннар.
Эр улус чаңчыл болу берген «Саң салыр» ёзулалга киришкеш, өг-бүлези-биле Шагааны уткуур дээш чаныпканнар. Тывага ай санаашкыны-биле Чаа чылды өг-бүлези, эш-өөрү-биле байырлап эрттирери чаагай чаңчыл. Өг-бүлениң байырлыг шайлаашкынының үезинде белектерни солчур чаңчыл база бар. Төрел аймактың улуг назылыг кежигүннеринче онза кичээнгейни салып турар. Байырлыг шайлаашкын үезинде улуг назылыг өгбелер чагыг-сөзүн берип, йөрээлдерни салыр.