Тываның беш муниципалдыг тургузугларында хөй-ниити шөлдерин чаагайжыдар төлевилелдер талазы-биле садыглажылганы чарлаан. Көдээ суурларда амыдырал-чуртталганың шынарын бедидеринче угланган «Көдээ черлерниң комплекстиг хөгжүлдези» күрүне программазы-биле ажылды чорудар.
Тудар азы чаартыр кылдыр планнаан объектилер даңзызында:
- Барыын-Хемчик кожууннуң Кызыл-Мажалык суурда скейт-парк;
- Бай-Тайга кожууннуң Тээли суурда база Эрзин кожууннуң Эрзин суурда спорт шөлдери;
- Кызыл кожууннуң Терлиг-Хая суурда база Чаа-Хөл кожууннуң Ак-Дуруг суурда уруглар ойнаар шөлдер кирген.
Регионалдыг Экономиктиг сайзырал болгаш үлетпүр яамызының дыңнатканы-биле алырга, төлевилелдерни элээн каш дөстерден, ооң иштинде федералдыг, республика, тус черниң бюджеттеринден, ол ышкаш бюджеттен дашкаар «Перспективтиг даг-руда төлевилелдери» АН биле «Тардан Голд» КХН-ден инвестицияларындан акшаландырар.
«Көдээ девискээрлерниң комплекстиг хөгжүлдези» күрүне программазы чүгле чурттакчыларга таарымчалыг байдалды тургузарындан аңгыда, аныяк специалистерни көдээ суурларже хаара тудар сорулгалыг. Тываның кожууннарында социал инфраструктураны хөгжүдеринге бо төлевилелдерниң күүселдези чугула базымны бээр.
2025 чылда программаны доозуп тура, республиканың дөрт муниципалдыг тургузугларында тудуг төлевилелдери боттандырганын сагындыраал: Тес-Хем кожууннуң Самагалтай суурда роллердром-скейт-парк, Бай-Тайганың Ээр-Хавак суурда универсалдыг спортчу болгаш уруглар ойнаар шөл, Кызыл кожууннуң Сукпак суурда ургулар ойнаар шөл база Өвүр кожууннуң Хандагайты суурда «Россия – Тыва» тураскаал чаагайжыттынган. Сөөлгү беш чылда 43 хөй-ниити черлерин септеп, эде-чаартып, чаагайжыткан.