Тываның Баштыңы база Тыва Республиканың Чазааның кежигүннери Мерген Маадыр-оолович Мынын-оолдуң чок болганы-биле ооң өг-бүлезинге болгаш чоок улузунга ханы кажыыдалды илередип тур бис. Мерген Маадыр-оолович республиканың чуртталга-коммунал адырының хөгжүлдезинге улуг үлүг-хуузун киирип, хөй чылдарда ак сеткилдиг ажылдаан.
Мерген Маадыр-ооловичиниң хоорай ажыл-агыйынга улуг арга-дуржулгазы республика деңнелинге чуртталга-коммуналдыг төлевилелдерни чедимчелиг боттандырар арганы берген. 2021 чылда Тыва Республиканың чуртталга-коммунал ажыл-агый сайыды кылдыр томуйлаткан. Ооң ажылдап турган үезинде яамы республиканың чуртталга-коммунал ажыл-агыйының эде чаартылга программазының күүселдезин дооскан, ооң иштинде Шагаан-Арыг хоорайның суг хандырар болгаш суг дамчыдар хоорзалар шугумнарын эде чаарткан.
Яамы «Арыг-силиг хоорай. Арыг суур» губернатор төлевилелин боттандырары-биле «Тыва Республиканың муниципалдыг тургузуглар аразында чаагайжыдылга, ногаанжыдылга болгаш арыг-силиг ажыл-чорудулгазын чорударынга шылгараан организация» деп республика мөөрейин чарлаан. Мерген Мынын-оол мөөрейниң организастаашкынын болгаш чорудуун боду хайгаарап турган.
«Тыва Республиканың чурттакчы чонун арыг суг-биле хандырары» иштики программа-биле яамы республиканың чурттакчылыг черлеринге боттарының суг хандырар аңгы системаларын чаагайжыдар ажылды чоруткан.
Мерген Мынын-ооловичиниң бедик билиг-мергежили, стратегтиг боданыышкыны, анрын айтырыгларны дүрген шиитпирлеп билири, кызымаккай чоруу болгаш шилип алган мергежилинге бердингени коллегаларының ханы хүндүткелин чаалап алган болгаш чаңгыс чер-чурттугларының сактыышкынынга артар.