Бо чылын Масленица неделязы февраль 16-дан 22-ге чедир уламчылаар. Бо бурунгу славян байырлал, кышты үдеп, часты уткуп алырын илередип турар. Байырлалды Православ ёзу-биле Улуг Посттуң мурнунда Быштак неделязы деп база адаар.
Үнүүшкүнче белеткел ажылдары амгы үеде чоруп турарын организакчылар тайылбырлаан. «Республиканың чурттакчыларынга өөрүшкүнү, чылыгны эккеп, блиныларны сөңнээр дээш, аъттаныптар бис! Өөрүшкүнү үлежир бодал бисти катап-катап сорук киирип тур» - деп, Орус культура төвү дыңнаткан. Амгы үеде төптүң ажылдакчылары костюмнарын даарап, ырыларын катаптап, шимээр каасталгаларны чыып турар. Февраль 22-де Чадаанага болур хемчег Өршээлдиг улуг-хүнде эртер. Аалчылар скоморохтар болгаш ряженыйларны сонуургап, улусчу оюннарга база шаңналдыг мөөрейлерге киржир. «Февральдың сооктарын безин тогбас ыры-шоор, танцы-сам, оюн-тоглаалар, аъш-чемнер дээш, орус байырлалдың делегейин болгаш чылыын эккээр бис. Бистиң сорулгавыс – Масленицаның өөрүшкүзүн болгаш элбекшилин бистиң республикавыстың бир булуңунуң чурттакчылары-биле үлежири!» -деп, байырлалдың эрттирикчилери демдеглээн.
Эрткен чылын Масленица байырлалын Хандагайты суурнуң төп шөлүнге демдеглеп эрттиргенин сагындыраал. Орус культура төвүнүң ажылдакчылары орус улустуң оюннарын, хороводту база саваңдан кылган дүрзүнү өрттедип, байырлалды эрттирген. Чагы бажынче үнер мөөрейге тиилээннер төлептиг белектерни алганнар. Тус черниң арбаннар аразынга мөөрейни база эрттирген, шупту киржикчилер өөрүп четтириишкин бижиктерин алганнар.
Кызылга эртер Масленица байырлалын хоорайның Культура, спорт, аныяктар политиказының эргелели чаңчыл езугаар эрттирер. Понедельникте, Масленицаның бирги хүнүнде, 3 дугаар школаның мурнунда шөлге байырлал болуп эрткен, аңаа «Найысылал» арт-төптүң база Хөй-ниити хемчеглер төвүнүң ажылдакчылары школачыларга программаны организастаан. Уруглар хендир тырттарынга, часпас адарынга, күш-шыдал маргылдааларынга база кожамыктаарынга мөөрейлешкен.
Вторникте Кызылдың 8 дугаар школазынга Масленицаны демдеглээн. Средада, февраль 18-те, «Азия төвү» скульптура комплекизинге байырлалдар болган. Четвергте 18 дугаар школага, а пятницада 1 дугаар школага байырлал болур. Субботада чурттакчылар 14 шакта, Арбат шөлүнге байырлалдың уламчызынга киржир. Улуг-хүнде Аныяктар шөлүнге 13:00 шакта эгелээр эң солун кезээ – «Масленица-блиноедка» деп аас чогаалының мөөрейлери Кызылдың чурттакчыларын болгаш аалчыларны чалап турар.