Ай санаашкыны-биле Чаа чыл - Шагаа бүдүүзүнде, Тываның Чазаанга шаңналдар тыпсыр езулал чаңчыл езугаар болуп эрткен. Регионнуң Баштыңы Владислав Ховалыг боттарының адырында онза чедиишкиннерни чедип алган республиканың чурттакчыларынга күрүне шаңналдарын тывыскан.
Владислав Ховалыг ол хемчегниң дугайында бодунуң телеграм каналынга чугаалап тура, Тываның келир үезин боттарның күш-ажылы болгаш талантызы-биле туткан кижилерге шаңналдарны тывысканын демдеглээн. «Бөгүн шылгараңгай ажыл-ишчилеривиске күрүне шаңналдарын тывыстывыс. Залда аңгы-аңгы салгалдың болгаш салым-чолдуң кижилери чыылган: мерген угаанныг хоочуннардан эгелээш, тура-соруктуг аныяк профессионалдарга чедир» - деп, республика Баштыңы чугаалаан.
Владислав Ховалыг бөгүнгү болуушкунга онза ужур-утканы, Чаа шагның эргилдезинде республикада чарлаттынган Тургузукчу күш-ажылдың болгаш өг-бүле ыдыктарының чылында уткуп турарын демдеглээн. «Бо дээрге чүгле кыйгырыг эвес-тир, ол бистиң оруувус-тур. Ажылчын кижиге хүндүткел болгаш өг-бүлениң одаанга бердинген чорук бистиң республикавыстың хөгжүлдезиниң кол шимчедикчи күжү чораан болгаш болуп артар» - деп, Владислав Ховалыг демдеглээн.
Бөгүн шаңнатканнарның аразында Владислав Ховалыгның эгелээшкини-биле 2025 чылда регионда тургустунган шылгаралдың тускай демдээ — «Өг-бүлениң үнелиг чүүлдерин кадагалааны дээш» деп Тыва Республиканың медалын алган ийи өг-бүле бар болганы онзагай. Бо медальды өг-бүле тутканындан бээр 50, 55, 60, 65, 70, 75 чыл оюн демдеглеп турар өг-бүлелерге тыпсырын сагындыраалыңар. Ол медальды өг-бүлениң чаңчылчаан үнелиг чүүлдерин кадагалап, сайзырадып, өг-бүле институдун быжыглаарынга, ниитилелге ооң ролюн бедидеринге ачы-хавыяазын көргүскени дээш, шаңнал-мактал база ниитилелдиң үнелели кылдыр тургускан. Бо чылын ол медальды өөредилге шугумунуң хоочуннары Алдын-оол Сендинович биле Долума Данзы-Белековна Сундуйларның база көдээ ажыл-агыйының хоочуну Александр Тас-оолович биле Тес-Хем кожууннуң төп эмнелгезиниң фтизиар эмчизи Людмила Николаевна Туматтарның өг-бүлелери алган.
Он аңгыда 13 кижи аңгы-аңгы күрүне шаңналдарынга төлептиг болган.
«Россияның юристери ассоциациязы» бүгү-российжи хөй-ниити организацияның Тыва Республикада баштаар чериниң даргазы Артур Монгалды «Ада-чурттуң мурнунга ачы-хавыяазы дээш» орденниң I чергезиниң медалы-биле шаңнаан.
«Тускай шериг операциязының киржикчизинге» медальды Тыва Республиканың ажыл-чорудулганың чамдык хевирлеринге лицензия бээр болгаш хайгаараар албан чериниң удуртукчузунуң оралакчызы Иван Монгушка, полицияның прапорщиги – Росгвардияның Тыва Республика талазы-биле эргелелиниң «Адыг» тускай сорулгалыг дүрген хөделир мотовзводунуң полицейжизи (чолаачызы) Айдаш Чоодуга тывыскан.
«Тыва Республиканың кадык камгалалының алдарлыг ажылдакчызы» атка кадык камгалалының хоочуну Майя Базыр-оол, «Тыва Республиканың алдарлыг артизи» атка Тываның «Саяннар» национал хөгжүм болгаш танцы театрының балет артизи Валентина Биин-оол, «Тыва Республиканың алдарлыг ажылдакчызы» атка «Орук-тудуг транпсорт» кызыгаарлаан харысаалгалыг ниитилелиниң директору Владимир Макшанов төлептиг болганнар.
«Тыва Республиканың өөредилгезиниң алдарлыг ажылдакчызы» хүндүлүг аттарны: Шагаан-Арыг хоорайның 2 дугаар «Сказка» уруглар садының кижизидикчи башкызы Зоя Саяновага, Барыын-Хемчик кожуун чагыргазының өөредилге эргелелиниң методизи Елена Хертекке, Тес-Хем кожууннуң өөредилге эргелелиниң комплекстиг айыыл чок чорук талазы-биле методизи Римма Соянга тывыскан.
Сүт-Хөл кожууннуң Суг-Аксының Тыва эки турачылар аттыг ортумак ниити билиг школазының эге класстар башкызы Роза Ондар «Тыва Республиканың алдарлыг башкызы» хүндүлүг атты алган. Чөөн-Хемчик кожууннуң Мерген-Херел Монгуш аттыг культура бажыңының кинотеатрның кол администратор Альберт Кара-Салга «Тыва Республиканың культуразының алдарлыг ажылдакчызы» атты тывыскан. Тываның ветеринария лабораториязының бактериология килдизиниң ветеринар эмчизи Урана Сарыглар «Тыва Республиканың көдээ ажыл-агыйының алдарлыг ажылдакчызы» атка төлептиг болган. ТЭК-4 башкарыкчы компанияның чиңгине директорунуң техниктиг айтырыглар талазы-биле оралакчызы – кол инженер Николай Данзы «Тыва Республиканың алдарлыг энергетиги” хүндүлүг атты алган.