Февральдың 18-те эртенгиниң 6:00 шакта Кызылга «Саң салыр» езулал чаңчыл езугаар болур. Аңаа киржир күзелдиг улуска эптиг болур кылдыр ону 8 аңгы шөлге эрттирер.«Саң салыры» деп чүл?
«Саң салыр» — арыглаашкын болгаш чаагай күзелдерниң езулалы. Езулал үезинде отка өргүлдү бээр: номну номчуп, чедиишкиннерни, кадыкшылды, өг-бүлеге болгаш чоок улузунга чүгле эки чүүлдерни дилээр. Ыдыктыг оттуң ыжы багай чүүлдерни ырадып, чаартылганы сөңнээр дээр.
Хемчеглер каяа болурул?
Ук езулал дараазынга черлерге болур:
• «Ганден Чойпелинг» хүрээзинге (солагай талакы чарык);
• «Дамба Брайбулинг» хүрээге;
• «Даши Панделинг» хүрээге;
• «Цеченлинг» хүрээге;
• «Тубтен Шедруб Линг» улуг хүрээге;
• «Кадарчы» тураскаалының чаны;
• «Дөгээ» даанга;
• Национал паркка («Хүреш» стадионнуң артынга).
«Кадарчы» тураскаалының база «Дөгээ» дааның баарынга Саң езулалдары - эң билдингир черлер.
Транспорт-биле канчаар чедерил?
Чурттакчыларга езулал болур черже чедип алыры эптиг болур кылдыр тускай хөй-ниити транспорту халдыыр.
«Кадарчы» тураскаалынга чедери
Автобустар эртенгиниң 5:00 шакта беш аңгы черден үнер:
• «ТЭЦ» доктаамы;
• «Звероферма»;
• «Южный»;
• «Вавилин ээтпээ»;
• солагай талакы дачалар ниитилелиниң 9-ку доктаамы.
«Дөгээ» даанга чедери
Транспорт эртенгиниң 5:00 шактан дараазында доктаамнардан үнер:
• «ТЭЦ»;
• «Вавилин ээтпээ»;
• «Звероферма».
Автобустар хөй-ниити транспортунуң чоруур маршруду-биле орук ара шупту доктаар черлерге турар.
Езулал төне бээрге, киржикчилерниң дедир чоруурунга транспорт аймаан организастаар.
Чүнү билзе чогуурул?
• Езулал 6:00 шакта эгелээр болганда, эртежик келир.
• Езулал ажык черге болур, ынчангаш чылыдыр хептенип алыңар.
• Корум-чурумну сагып, езулалдың киржикчилерин-даа, ужур-чаңчылдарны-даа хүндүлеңер.
• Организакчылар болгаш транспорт ажылдакчылары чүнү айтып бээр-дир, ону эдериңер.
Теги:
Тыва, Шагаа-2026