Владислав Ховалыг Россия Федерациязының күрүне шаңналдарынга төлептиг болган чаңгыс чер чурттугларынга байырны чедирген. Россияның Президентизи Владимир Путинниң чарлыы-биле Аржаан Бышкак биле Сайдам Содунамның өг-бүлези «Ада-иениң алдары» орденниң медалы-биле шаңнаткан. Тыва Республиканың алдарлыг ажылдакчызы, муниципалдыг албанның, иштики херектерниң хоочуну, Виктор Пюрюна «Ада-чуртунуң мурнунга ачы-хавыяазы» деп орденниң 2-ги чергези-биле шаңнаткан.
«Бедик күрүне шаңналы дээш Аржаан Бышкак биле Сайдам Содунамга республиканың бүгү чурттакчыларының база бодумнуң өмүнээмден байыр чедирип тур мен! Россияның Президентизиниң чарлыы-биле оларга «Ада-иениң алдары» орденни тывыскан. Ол ышкаш Виктор Пюрюнага база сеткилим ханызындан байырым чедирдим. Силерниң профессионал, харыысалгалыг база ажылыңарга бердинген чорууңар регионнуң экономиказын болгаш социал адырын хөгжүдеринге идегелдиг үндезин болуп келген. Силер ышкаш кижилер Тываны бурунгаар шимчедип, боттарының хүн бүрүде кызымак күш-ажылы-биле бөгүнгү болгаш даартагы чедиишкиннерни тургузуп турар» - деп, Тываның Баштыңы шаңнаткан чаңгыс чер чурттугларының дугайында бижээн.
Иштики херектер органнарының ажылдакчызы Аржаан Бышкак биле Олимпийжи курлавыр училищезиниң башкызы Сайдам Содунам дөрт ажы-төлдү өстүрүп чоруурлар. Өг-бүлениң улуг уруу 15 харлыг, хеймер оглу 4 харлыг. Олар 17 чыл кады ынак, эп-найыралдыг, ажы-төлүнге бердинген чурттап чоруур.
Аржаан Бышкак биле Сайдам Содунамның ышкаш өг-бүлелер Тываның быжыг үндезини, тыва ниитилелдиң чөленгиижи, көскү үлегер-чижээ дээрзин республика баштыңы онзалап демдеглээн.
Владислав Ховалыгның бодалы-биле алырга, муниципалдыг албанның хоочуну, Шагаан-Арыг хоорайның хүндүлүг хамаатызы, Улуг-Хем кожууннуң хүндүлүг хамаатызы, Тыва Республиканың хүндүлүг хамаатызы Виктор Кууларович Пюрюнаны «Ада-чурт мурнунга ачы-хавыяазы дээш» орденниң медалы-биле шаңнааны ооң хөй чылдарда ак сеткилдиг күш-ажылынга төлептиг үнелел болур.
Виктор Кууларовичиниң күш-ажылчы базымнары республикада Хову-Аксы суурда «Тува-кобальт» комбинады, Ак-Довурак хоорайда «Туваасбест» комбинады дээн ышкаш, улуг бүдүрүлгелерден эгелээн. Инженер-энергетик мергежилдиг Виктор Кууларович Шагаан-Арыг хоорайның чылыдылга-энергетика инфраструктуразын тударынга хууда үлүг-хуузун киирген.
Республиканың иштики херектер органнарынга ак сеткилдиг албанын эрттирген. Халашкан соонда, Улуг-Хем кожуун чагыргазының даргазынга хөй чылдарда ажылдаан. Өөнүң ишти Тамара Васильевна-биле үш кысты, бир оолду кижизиткен; эрткен чылын хоочуннар өг-бүле тутканындан бээр 50 чылын демдеглээн.
Владислав Ховалыг 2026 чылда республикада чарлаан Тургузукчу күш-ажылдың болгаш өг-бүле ыдыктарының чылында, Тыва чурттакчылары күрүне шаңналдарын алганы улуг ужур-уткалыг деп демдеглээн: «Бо анаа-ла таварылга эвес, а шын орукту шилип алганынга дорт бадыткал-дыр: өг-бүлезинге хүндүткел болгаш ажылчын кижи төрээн республикавыстың хөгжүлдезинге кол шимчедикчи күш болуп чоруур болгаш артар-даа» - деп, Баштың демдеглээн.