Тывада 2023 чылдан эгелеп «Тываның бичии пассажири» регионалдыг профилактика кампаниязы чедиишкинниг ажылдап турар. Бо эгелээшкин республиканың бичии чурттакчыларының автомашинага чоруурунуң айыыл чок чоруун бедидеринче угланган.
Регионнуң орук-транспорт яамызы ук акция-биле хереглелдиг өг-бүлелерге уругларның камгалалын хандырар тускай дериг-херекселди бээр адрестиг ажылды чорудуп турар. Ылаңгыя орук озал-ондактары бо-ла болгулаар кожууннарже онза кичээнгей салдынган.
Программаның шилилге негелдези-биле, чаңчылчаан үнелиг чүүлдерни, Төрээн черинге ынакшылды, быжыг өг-бүлениң ужурларынга, езу-чаңчылдарга, чогаадыкчы чорукка, күш-ажылга, кадыкшылга хүндүткелди кижизидип чоруур социал харыысалгалыг болгаш идепкейлиг, хөй ажы-төлдүг (беш азы оон-даа хөй) өг-бүлелер; волонтер шимчээшкиннеринге, ачы-буян ажылдарынга болгаш хөй-ниитичи эгелээшкиннеринге киржип турар социал идепкейлиг өг-бүлелер; профессионал чедиишкиннери-биле ылгалып азы өг-бүле бизнезин чедиишкинниг сайзырадып турар өг-бүлелер; кадык амыдыралды эдерип, идепкейлиг дыштанылгага болгаш күш-культурага ынак өг-бүлелер; ажы-төлүн чогаадыкчы ажылдарже хаара тудуп, чонунуң культурлуг өнчү-хөреңгизи болгаш чаңчылдары-биле таныштырып чоруур өг-бүлелер бирги ээлчегде ону алыр.
Чаа чылда буянныг чаңчылын эрттирери төлевилелдиң чаңчыл апарган. 2024 чылдан эгелеп Тываның орук-транспорт сайыды Шораан Чыргал-оол республикада бир дугаар төрүттүнген чаш төлге автокреслону чылдың-на белекке берип турар.
Бо хүнге чедир «Тываның бичии пассажири» акциязы-биле республиканың чурттакчылары 49 камгалал сандайларны алганнар. Төлевилел уругларга айыыл чок аян-чорукту магадылаан ажылын уламчылап турар.