Кызылдың аэропорту федералдыг болгаш күрүне бүдүрүлгелериниң аразынга «Чылдың эң эки биче аэропорту» деп XII-ги национал премияның «Россияның агаар хаалгазы» деп атка төлептиг болган. Москвага болуп эрткен чурттуң профессионал авиация ниитилелин каттыштырып турар кол адырның хемчээ – NAIS-2026 Национал хамааты авиация делгелгезиниң болгаш форумунуң байырлыг езулалында шаңналды алган.
Тываның Баштыңы Владислав Ховалыг аэропорт ажылдакчыларының чедиишкиннниг ажылын демдеглеп, төлептиг шаңналды алганы дээш байырны чедирген.
«Бо улуг шаңнал бистиң аэропортувустуң шапкын хөгжүп, ачы-дузаның шынарын бедидип, айыыл чок чоруктуң амгы үениң негелделерин боттандырып турарынга бадыткал-дыр. Аэропорт ажылдакчыларынга быжыг кадыкшылды, арыг дээрни, чымчак хонуушкунну, бистиң республикавыстың чаагай чоруу дээш чаа профессионал чедиишкиннерни күзедим» - деп, регионнуң удуртукчузу бодунуң телеграм каналында бижээн.
Владислав Ховалыг хамааты авиация ажылдакчылары бөгүн боттарының профессионал байырлалын демдеглеп турарын база сагындырган. Тываның делгем девискээри, кадыг-дошкун агаар-бойдузу, ырак-узак черлери агаар транспортунга онза хереглелдиг дээрзин ол демдеглээн.
«Бо чылын Тываның хамааты авиациязының 80 чылын демдеглээр бис. Бо он-он чылдарның дургузунда агаар оруктары ажыттынган, бедик мергежилдиг кадрлар белеткеттинген, бүзүрелдиг авиа инфраструктура тургустунган» - деп, республика Баштыңы демдеглээн.
Сөөлгү беш чылда Кызылдың аэропорту таварыштыр пассажирлер аргыжылгазы 2,6 катап өскен. Республиканың ырак-узак кожууннарынче база Россияның кол хоорайлары — Москва, Новосибирск, Красноярск, Улан-Удэже авиааргыжылга экижээн. Россия Федерациязының Президентизиниң база Россияның Чазааның деткимчези-биле аэропорттуң ужудуп-хондурар шөлдерин чаартып, каайлы-кызыгаар терминалын туткан соонда, 2025 чылда Тывага Кызыл - Улан-Батор – Кызыл маршруттуг бир дугаар делегей чергелиг ужудуушкун ажыттынган.
Оон ыңай, Тываның Баштыңы Дээди Хуралга Айыткалында, Томск хоорайже чаа агаар оруун ажыдар талазы-биле ажылдар уламчылап турарын дыңнаткан.