Тываның Баштыңы республика чазаанга болуп эрткен ужуражылга үезинде, Мурнуу Көреяның Тхэбэк хоорайга Бүгү-делегейниң ийиги бадук (го) конгрезинге Россияны төлээлеп киришкен Тываның Го федерациязының командазынга боду байырны чедирген. Делегейниң он ажыг чурттарындан 300 ажыг киржикчилер чыылган улуг хемчээлдиг маргылдаага Тываның командазы шыырак ойнап, ийи кубокту, беш алдын, чеди мөңгүн, ийи хүлер медальдарны чаалап ап, чайынналчак тиилелгелиг чанып келгеннер. Ооң мурнунда кымга-даа билдинмес команданың бирги киржилгези ойнакчыларны кайгадыпкан.
«Бүгү Тываның ёзулуг чоргааралы ол-дур» - деп, Владислав Ховалыг бодунуң блогунда регионнуң эң аныяк спортчу организациязының бирээзиниң делегейниң спортчу ареназынга кайгамчык чедиишкиннерин онзалап демдеглээн. Тыва Республиканың Го федерациязы чүгле чыл бурунгаар тургустунган. Тываның аныяк спортчуларының тиилелгелери ханы ужур-уткалыг, чүге дээрге го оюну бистиң республиканың төөгүзүнүң база бир кезээ болур — амгы тываларның өгбелери гонуң төвүт хевирин ойнап чорааннар.
Тываның Баштыңы команда кежигүннериниң чедиишкиннери-биле изиг байырны чедиргеш, бо угаан оюнунга баштайгы базымнары канчаар эгелээнин сонуургаан. Эрткен чылдың сентябрьда элээн каш чурттар киришкен «Көшкүн чоннуң найыры» 1-ги делегей чергелиг маргылдаага тыва спортчуларның база бир тиилелгезин демдеглээн.
«Бистиң оолдарывыстың ол арга-дуржулгазы Мурнуу Көреяга бүзүрелдиг ойнаарынга дузалаан. Бистиң командавыстың бедик чедиишкини дээш байырны чедирип, кады өөрүп тур мен. Бо дээрге оларның улуг тиилелгелерже чүгле эгези-дир дээрзинге бүзүрээр мен!» - деп, Владислав Ховалыг оолдарга кадыкшылды, хей-аътты, чаа-чаа тиилелгелерни күзээн.
2024 чылдың май айда Чамзырын Мижит Тывага Го федерациязын тургусканын сагындыраал. 2025 чылда республикага Россияның Го федерациязының президентизи Максим Волков баштаан төлээлериниң Тывага аалдап келгениниң соонда, оюн нептереп эгелээн.