Февраль 8-те бистиң чуртувус 1999 чылдың июньда бадылаан Россияның эртем хүнүн болгаш Россияның Эртемнер академиязының тургустунган хүнүн демдеглеп турар. Тываның Баштыңы Владислав Ховалыг байырлалдың бо хүн-биле Тыва Республиканың эртем ниитилелинге байырны чедирген.
Регионнуң удуртукчузу байыр чедириишкининде төрээн республиказының социал-экономиктиг хөгжүлдезинге тыва эртемденнерниң шинчилелдериниң үлүг-хуузун демдеглээн: «Эртемденнеривистиң ажыдыышкыннары – экономикага, социал адырга, бистиң бот-тускайлаңывысты кадагалап арттырарынга практиктиг үлүг-хуузу болур. Ылаңгыя республикага шинчилел ажылының быжыг үндезинин салган хоочун эртемнерге өөрүп четтириишкиннниң болгаш хүндүткелдиң онза өөрүп четтириишкинин илередип тур мен. Силерниң мерген угааныңар болгаш арга-дуржулгаңар канчаар-даа аажок үнелиг» - Владислав Ховалыг социал четкилеринде салган байыр чедириишкининде демдеглээн.
Республиканың удуртукчузу бурунгаар депшилгениң шимчедикчилери аныяк эртемденнерге база байырны чедирген: «Силерниң тура-сорууңар, чаа көрүжүңер, чаа шиитпирлерни дилээринге эрес-дидим чорууңар бөгүн кажангызындан-даа артык чугула» - деп, Владислав Ховалыг айыткан.
Тываның Баштыңы республиканың шупту эртемденнеринге быжыг кадыкшылды, төрээн республиказының хөгжүлдези болгаш чечектелиишкини дээш эгээртинмес хей-аътты, чаа депшилгелиг эгелээшкиннерни, оларны чедиишкинниг боттандырарын күзээн.
Тыва Республиканың Өөредилге яамызының дыңнатканы болза, республикада 390 эртем ажылдакчылары эртем-шинчилел ажылдары-биле ажылдап турар, оларның 24-ү доктор, 324-ү кандидат эртем чадалыг. Эртемденнерниң 34 хуузу - 39 хар четпээн аныяктар. 2025 чылда олардан беш кижи кандидат диссертациязын чедиишкинниг камгалаан. Ол сан-чурагайлардан алырга, республиканың эртем кадрлары аныяксаанын ведомство демдеглээн.
Тываның Баштыңы республиканың аныяк эртемденнерин деткиири-биле грант шаңналын доктааткан. 2025 чылда аныяк эртемденнерниң физика-техниктиг, бойдус, көдээ ажыл-агый, ниитилел болгаш медицина эртемнеринде беш эртем төлевилели грантыга төлептиг болган.