Тываның Баштыңының Дээди Хуралга (парламентиге) чылдың-на бээр Айыткалында өөредилге адырының айтырыы – Россияның Өөредилге яамызының чарлааны Школа назыны четпээн уруглар өөредилгезиниң чылы аңгы тема болган. Уруглар садтарының башкыларының ачы-хавыяазын онзалап демдеглээри-биле регионнуң Өөредилге яамызының чаа ведомство шаңналы — «Тыва Республиканың школа назыны четпээн уруглар өөредилгезиниң алдарлыг ажылдакчызы» хүндүлүг атты тургузар дээн эгелээшкинин Владислав Ховалыг деткээн.
Республиканың баштыңы деткимче хемчээн кииргенин чарлап тура, регионалдыг өөредилге системазынга Школа назыны четпээн уругларның өөредилге чылы онза ужур-уткалыг дээрзин демдеглээн.
«Бо эгелээшкин школа назыны четпээн уруглар өөредилгезиниң болгаш сайзыралының шынарын бедидеринче, уруглар садтарының инфраструктуразын экижидеринче, башкыларны деткииринче угланган. Тывага эрттирер хемчеглер планының төлевилелин ажылдап кылган. Бистиң уруг-дарыывысты бүгү талазы-биле сайзырадыр системага ол чүгле ажыктыг болурунга бүзүрээр мен» - деп, Владислав Ховалыг чугаалаан.
Тывада амгы үеде школа назыны четпээн 221 өөредилге албан черлери бар, ында 26 муң ажыг уруглар хаара туттунган. Уруглар садтарының 5 муң ажыг башкылары болгаш ажылдакчылары чаштарны өөредип, кижизидип турар.
Тывада школа назыны четпээн уруглар өөредилгезиниң чылында уруглар садтарында ургуларга өөредилгениң шынарын болгаш анаа турарының байдалдарын экижидеринче угланган хемчеглер планнаттынган. Уруглар коллективтериниң эртем-шинчилел ажыл-чорудулгазын хөгжүдеринче, школа назыны четпээн уруглар өөредилгезиниң эрге-хоойлу баазазын база организас-методиктиг хандырылгазын экижидеринче, кадрлар курлавырын быжыглаарынче онза кичээнгейни угландырган.
Бо неделяда Кызылдың уруглар садтарынга Тываның күрүне университединиң Кызылдың педагогика институду биле Кызылдың педагогика колледжизиниң школа назыны четпээн уруглар өөредилге факультединиң студентилеринге ажык эжиктер хүннери эртип турар. Келир үениң башкылары школа назыны четпээн уруглар-биле ажылдаарының амгы үениң аргалары-биле таныжып, аңгы-аңгы угланыышкыннарлыг практиктиг кичээлдерде киржип турар.