Тываның Баштыңы Владислав Ховалыг Тыва Республиканың прокурору Евгений Ботвинкинниң удуртуп эрттиргени республиканың прокуратуразының коллегия хуралынга 2025 чылда хайгаарал органының ажылдаанын түңнээн. Ооң ажылынга Тыва Республика талазы-биле кол федералдыг инспектор Александр Вавилихин, Тыва Республиканың Дээди Хуралының (парламентизиниң) даргазы Каң-оол Даваа, республика прокуратуразының аппарат база территориалдыг прокуратура ажылдакчылары киришкен.
Владислав Ховалыг хуралдың ажыдыышкынынга сөстү алгаш, национал төлевилелдер болгаш күрүне программаларының күүселдези-биле регионда чуртталга тудуунуң чорудуун база Тываның социал-экономиктиг хөгжүлдезиниң бот-тускай программазын боттандырып турар хемчеглерни контрольдаар талазы-биле хайгаарал ведомствозунуң дээштиг ажылын демдеглээн. Ол ышкаш регионнуң чазаа болгаш удуртулганың муниципалдыг органнары нормативтиг эрге-хоойлу актыларын хүлээп алырынга прокуратура-биле кады сырый кады ажылдажылганы уламчылаары чугула дээрзин демдеглээн.
Владислав Ховалыг тускай шериг операциязының киржикчилериниң эргелерин калбартыр өскертилге кирген Тыва Республиканың «Чер дугайында» хоойлузун хүлээп алыры-биле ажылдар чоруп турарын чугаалаан. Ол ышкаш аныяк өг-бүлелерни деткээн регионалдыг программа ажылдап, ооң ачызында тускай операцияга киришкен 31 өг-бүле чурттаар оран-сава байдалын 2025 чылда экижиткен болза, 2026 чылда 23 өг-бүлени деткиир.
Владислав Ховалыг прокуратураның ажылдакчыларынга бедик мергежили болгаш шынчы чоруу дээш четтиргенин илередип, кады ажылдажылга хамаатыларның эрге-ажыын камгалаарынга, корум-чурумну быжыглаарынга боттуг түңнелдерни эккээринге бүзүрелин илереткен.
Республиканың прокурору Евгений Ботвинкин регионда хоойлу-дүрүм база корум-чурум сагылгазының байдалынга үнелелди берип тура, Тыва Республиканың прокуратуразы регионалдыг эрге-чагырга органнары болгаш корум-чурум камгалаар ведомстволар-биле кады ниитилелдиң болгаш күрүнениң чугула социал айтырыгларын шиитпирлээр, хамаатыларның эргелерин камгалаар, сонуургалдарын камгалаар талазы-биле улуг ажылды кылганын демдеглээн.
2025 чылда прокурорлар федералдыг хоойлужудулганы хажыткан 15 муң ажыг үрээшкиннерни илередип, 7,3 муң айтыышкыннарны үндүрүп, 1,9 муң удурланыышкыннарны киирип, судтарже 2 муң ажыг хомудалдарны болгаш билдириишкиннерни чоруткан.
Прокурорларның инициативазы-биле 4,8 муң кижиге административтиг болгаш чурум үрээни дээш харыысалгага онааган. Прокурор хыналдаларынга даянгаш, 37 кеземче херээн оттурган.
2025 чылдың түңнелдерин сайгарган соонда, бо чылын регионда хоойлу болгаш корум-чурум сагылгазын хандырар элээн каш кол айтырыгларны тодараткан. Хамаатыларның, инвалидтерниң болгаш улуг назылыг кижилерниң, тускай шериг операциязының киржикчилериниң болгаш оларның өг-бүле кежигүннериниң социал эргелерин хандырары кол угланыышкыннар болуп арткан.