Владислав Ховалыг Тыва Республиканың иштики херектер сайыды Юрий Завьялов-биле ажылчын ужуражылганы эрттирген. Республика девискээринге корум-чурумну быжыглаарынга кады ажылдажылганы, полиция ажылдакчыларынга чурттаар оран-сава тударының планнарын, регионнуң ИХЯ-ның административтиг бажыңының капиталдыг чаартылгазын ийи тала сайгарган.
Корум-чурум камгалаар ведомствонуң эрткен чылда ажыл-чорудулгазын сайгарып, бо чылдың бирги айының түңнелдерин делгереңгей катап көргеннер.
Чижээ, 2026 чылдың январьда өлүрүүшкүннер, кадыкшылга аар кемдээшкиннер чедирген болгаш когаралдыг орук озал-ондактарының саны эвээжээни демдеглеттинген. Республиканың оруктарынга 25 орук озал-ондактары бүрүткеттинген, оон үш кижи амы-тынындан чарылган, 31 кижи кемдээн болза, а 2025 чылдың ол-ла үезинде 31 озал-ондак демдеглеттинген, ооң түңнелинде 5 кижи өлген, 40 кижи кемдээн.
«Январьның статистиказында эки көргүзүглер бар: республикада өлүрүүшкүннер болгаш кадыкшылга аар кемдээшкиннер чедирген таварылгалар эвээжээн. Бо дээрге профилактиканы доктаамал чорутканының түңнели-дир, ынчалза-даа суларап болбас. Амгы үеде күжениишкиннеривисти кайнаар угландырарын: ырактан элзээдип бузурар чорукка удур, хөй-ниити черлеринге айыыл чок чорук дээш ажылдаарын сайгардывыс» - деп, Владислав Ховалы бодунуң телеграм каналында ужуражылганы тайылбырлаан.
Оон аңгыда эзирик байдалдыг кылган корум-чурум үүлгедиглерин болдурбазын база регионнуң ИХЯ-зының ажыл-чорудулгазының өске-даа адырларын сайгарган. Бо чылдың август айда Тывага болуп эртер IV-кү делегей чергелиг сарыг шажын форумунга белеткел дугайында чугаа ужуражылганың кол угланыышкыны болган.
Юрий Завьялов оон аңгыда чурттаар оран-сава хереглеп турар ажылдакчыларынга хөй аалдыг чуртталга бажыңын Кызылдың Ооржак Лопсанчап кудумчузунга тудар төлевилелди боттандырарының чорудуун Владислав Ховалыгга таныштырган. Регионалдыг ужур-уткалыг культура өнчүзү болур Тыва Республикага ИХЯ-ның административтиг бажыңын септээриниң амгы планнарын база чугаалашкан.