Тыва Республиканың Дээди Хуралының (парламентизиниң) Даргазы Каң-оол Даваа депутаттарның ажыл-чорудулгазынга, ылаңгыя тускай шериг операциязының киржикчилерин деткээн ажылынга үнелелди бергени дээш Тываның Баштыңы Владислав Ховалыгга четтиргенин илереткен. Каң-оол Даваа регионнуң хоойлужудулга болгаш күүсекчи эрге-чагырга органнары бүгү-ле айтырыгларны демниг болгаш үе шаанда шиитпирлээр дээш кады ажылдаанының түңнели-дир дээрзин демдеглээн.
Дээди Хуралдың (парламентиниң) даргазы 2026 чылда Күрүне Думазының депутаттарынче база республиканың дээди албан-дужаалынче соңгулдалар болуп эрттирериниң чугулазын барымдаалап, Тываның Баштыңының айыткан кол сорулгаларын база демдеглээн.
«Соңгулдалар үезинде партиялар Россияның болгаш Тываның сонуургалдарын удуртулга болдуруп база соңгукчуларның үзел-бодалын дыңнаар ужурлуг дээрзин Баштың шын демдегледи. Соңгулда мурнунда сайгарылгалар чөптүг болгаш тургузукчу болур ужурлуг.
Дээди Хурал, төлээлекчи орган болганда, соңгулда кампанияларының үезинде хоойлу езугаар эртерин, ажык-чарлыг чорукту болгаш корум-чурумну хандырып, ол чугула ажылга деткимчени көргүзер хүлээлгелиг.
Оон аңгыда күүсекчи эрге-чагырга чон-биле ажык чугааны чорударынга белен дээнин үнелеп тур. Дээди Хурал хоойлу-дүрүмнү экижидеринче база амыдыралдың шынарын бедидеринче угланган санал-оналдарга бодунуң талазындан кезээде ажык.
Сорулгаларывысты чедип алыр дээш, шупту күжениишкиннерни каттыштырып, чаңгыс демивисти болгаш тура-соруувусту быжыглаар ужурлуг бис» - деп, Даваа демдеглээн.