Тываның Баштыңы Владислав Ховалыг регионнуң Күш-ажыл болгаш социал политика яамызының удуртукчузу Эдуард Санданны Тыва Республиканың Чазааның Даргазының оралакчызының албан-дужаалынга томуйлаар дугайында чарлыкка атты салган. Чаа албан-дужаалынга ол экономиктиг хөгжүлдени болгаш саң-хөө хандырылгазын удуртуп башкарар.
Тес-Хем кожууннуң Самагалтай суурнуң чурттакчызы ийи дээди өөредилге черин – Чөөн-Сибирьниң күрүнениң культура болгаш уран чүүл академиязын база Байкалдың күрүне университединиң экономика болгаш эрге-хоойлу факультединиң «социал дарның менеджментизи» болгаш «юриспруденция» талазы-биле дооскан.
Күш-ажылчы базымнарын 2006 чылда Тываның Саң-хөө яамызынга башкарыкчы специалист болуп эгелээн. Тыва Республиканың саң-хөө яамызының килдис начальниги, социал адырның бюджет политиказының килдис начальниги, бюджет политиказының департамент начальниги, сайыттың бирги оралакчызы болуп ажылдаан арга-дуржулгалыг.
2016 чылдың марттан 2017 чылдың июньга чедир федералдыг күрүнениң статистика албанының Красноярск край, Хакас Республика, Тыва Республика талазы-биле эргелел начальнигиниң оралакчызынга ажылдап турган.
Эдуард Сандан 2021 чылдың июнь айдан амгы үеге чедир Тываның күш-ажыл болгаш социал политика сайыдының албан-дужаалынга ажылдаан.
Февраль 28-те эрткен Тыва Республиканың Дээди Хуралының (парламентизиниң) дөрткү чыыжының бирги ээлчеглиг хуралының үезинде, депутаттар Эдуард Санданны Тыва Республиканың Чазааның Даргазының оралакчызының албан-дужаалынга томуйлаарын бадылаан.
2025 чылдың декабрьдан бээр корум-чурум, хөй-ниитиниң айыыл чок чоруун хандырар, терроржу болгаш экстремисчи чоукту болдурбас айтырыглар талазы-биле адырда база хамааты камгалал болгаш онза байдалдарны болдурбас болгаш чайладыр ажыл-чорудулганы дүүштүрерин хандырар Чазак Даргазының оралакчызының хүлээлгезин күүседип келген Шолбан Сендашты парламентарийлер Тываның Чазааның Даргазының оралакчы албан-дужаалынга бадылаан.