Январь 27-де Владислав Ховалыг республиканың Кадык камгалал яамызының удуртулгазы-биле ажылчын байдалда ужурашкан. Кадык камгалал сайыды Анатолий Югай баштаан команда эрткен чылдың түңнелдерин болгаш бо чылда мурнады көөр ажылдың угланыышкыннарын таныштырган . Ол ышкаш комплекстиг ажыл негеттинер берге айтырыгларны сайгарган.
«Деңзигүүрлүг шиитпирлер негеттинип турар чидиг айтырыгларны ажык чугаалажыышкын үезинде сайгарып көрдүвүс. Оларның аразында ыраккы суурларга эмчи дузазының чедингирин чедип алыры, кадрлар-биле хандырылга, поликлиникаларның материал-техниктиг баазазын чаартыры, аарыгны болдурбас болгаш эрте чадазында илередир программаларны боттандырар чугула темалар бар» - деп, Владислав Ховалыг бодунуң Телеграм каналынга дыңнаткан.
Тываның Кадык камгалал яамызы 2026 чылда информастыг медицина системаларын эде чаартыр, кадык камгалалының дөрт албан черинге агар септелгелерни болгаш сес тудугга капитал септелгелерни чорудары, онза байдалдарны чайладып база болдурбазы-биле одалга сезонунга белеткел үезинде кадык камгалалының 42 албан черлериниң чылыдылга системаларын септээри дээш, өске-даа ажылдарны планнаан.
Оон аңгыда, көдээге ажылдаар күзелдиг эмчилерни деткиир база кадык камгалалының бирги звенозунга чаа дериг-херекселдер садып алыр хемчеглерни уламчылаар. Кадык камгалал яамызының 2026 чылда мурнады боттандырар угланыышкыннарында чиигелделиг бөлүктүң хамаатыларын чугула эмнер-биле хандырары, эпидемияга удур профилактиктиг тарылга графигинче кирген иммунобиологтуг эмнерни болгаш чаа төрүттүнген чаштарны шинчиир реактивтерни садып алыры база кирген.
Анатолий Югай ол айтырыглардан эң кол чүүл – инвалид кижилерге реабилитация болгаш абилитация программаларын боттандырганынга учетту кылыры-биле Тыва Республиканың кадык камгалал адырында РМИАС-17 күрүнениң кадык камгалалының информастыг системазы-биле «Социал адырда чаңгыс аай төпчүткен чурагай шөлү» күрүнениң информастыг системазын каттыштырарын чедип алыры чугула дээрзин демдеглээн. Оон аңгыда чигир аарыглыг болгаш гипертония аарыг кижилерниң кадыының көргүзүглерин ырактан хайгаараар программаларны боттандырары чугула. Ниитизи-биле алырга, электроннуг эмчи документилериниң структурлуг чаа хевирлирин киирер дээш кадык камгалалының информастыг системаларын эде чаартыры негеттинип турар.
Республиканың Баштыңы болгаш Кадык камгалал яамызының удуртукчулары амгы сорулгаларны чедип алырының планнарын сайгарган. Владислав Ховалыг адырны хөгжүдеринге ведомствону болгаш бүгү-ле эмчилер ниитилелин деткииринге беленин илереткен.
«Кадык камгалалы – бистиң республиканың чурттакчы бүрүзүнге эң-не херек болгаш чугула адырларның бирээзи дээрзи билдингир. Бистиң кол сорулгавыс – Тывага эмчи дузазының чүгле чедингирин эвес, а ооң амгы үениң стандарттарынга дүүштүр шынарын хандырары. Ону чедип алыр дээш шупту херек хемчеглерни кылыр бис» - деп, Владислав Ховалыг ужуражылганың түңнелинде чугаалаан.