Тываның чонну ажылга хаара тудар төвү 2025 чылда социал керээ езугаар деткимче программазының түңнелдерин үндүрген. Республиканың 3569 чурттакчызы амыдыралдың берге байдалдарын ажып эртеринге адрестиг дузаны болгаш чаа аргаларны алган. Өг-бүлелерни деткииринче угланган акша-хөреңгиниң ниити түңү 751 млн ажыг рубль болган. Ол деткимче программазы национал «Өг-бүле» төлевилелдиң езугаар боттанып турар.
Отчеттуг үениң дургузунда 1248 керээлерни бодунуң херээн эгелеп, хөгжүдеринче чарган. Бизнес угланыышкыннары-биле чергелештир, деткимчениң өске хевирлери хереглелдиг бооп арткан:
* 854 керээ ажылче тургустунарынга дузалаан.
* көдээ ажыл-агыйынгап чугула херектиг хууда ажыл-агыйларын хөгжүдеринге 957 керээ чардынган.
* 510 дугуржулга амыдыралдың берге байдалдарын ажып эртер өске-даа хемчеглерни хаара туткан.
«Социал керээ дээрге чүгле материалдыг дузазы эвес-тир. Ол дээрге кижи бүрүзү-биле кады тургузуп турарывыс турум чорукче бот-тускайлаң орук-тур. Бистиң ажылывыс амыдырап чурттаарының кудук деңнелинден эвээш орулгалыг билдириишкин кииркичзиниң байдалын ханы сайгарып көөрүнден эгелээр. Бистиң карьера талазы-биле консультантыларывыс ажыл-чорудулга планын тургузарынга, резюмезин белеткээринге болгаш келир үеде чедимчелиг чугаалажылгаларны чорударынга арга-дуржулга алырын хандырар» - деп, Тыва Республикада «Россияда ажыл» кадрлар төвүнүң директору Айлана Бюрбю тайылбырлаан.
Регионнуң чурттакчылары колдуунда-ла идик-хеп даараар болгаш септээр ательелер, бичежек кафелер, кондитер цехтери, ол ышкаш чараштаныр студиялар болгаш тус черниң продукциязының мини-бүдүрүкчүлери дээн ышкаш хууда сайгарлыкчы ажыдып, азы ажыл-биле бот-хандыртынган статусту кылдыртып турар. Керээниң негелдези-биле боттарының ажыл-херээн хөгжүдеринге 350 муң рубль чедир акшаны ап болур. Күрүне деткимчези чокта чүгле саазынга артып каап болур бизнес-идеяларны боттандырарынга ол акша-хөреңги дузалаар.
Тывада социал керээ программазының боттандырылгазы амыдырал-чуртталганың деңнелин бедидеринче болгаш хамаатыларның экономиктиг хамаарышпас чоруун деткииринче угланган регионалдыг политиканың эң-не чедимчелиг аргаларының бирээзи бооп арткан.