Тываның Баштыңы Владислав Ховалыг республиканың чаа прокурору Евгений Ботвинкин-биле ажылчын байдалда ужурашкан. Регион удуртукчузунуң бодунуң телеграм каналында дыңнатканы-биле алырга, республиканың мурнунда чидиг айтырыгларны шиитпирлээрде прокуратура биле күүсекчи эрге-чагырга органнарының кады ажылдажылгазынче угланган чугаа болган.
Чугаалажылганың түңнелинде, ведомстволар аразының кем-херек үүлгедиишкиннеринге удур демиселиниң комплекстиг планын боттандырып, кады ажылдаар айтырыгларын чиге тодаратканын Владислав Ховалыг демдеглээн.
«Хамаатыларның айыыл чок чоруу – бистиң эң кол угланыышкынывыс болур. Мында эрге-хоойлу камгалаар система-биле кады ажылдажылга сырый демниг чоруур ужурлуг. Ол дээрге кижилерниң эрге-ажыын камгалаары, корум-чурумну тудары, кижи бүрүзү бодун хоойлу езугаар камгалаттынганын билип турар байдалды тургузары-дыр» - деп, Владислав Ховалыг чугаалаан.
Чүгле кады күжениишкиннер-биле республиканың дең эргелиг хөгжүлдезин болгаш турум келир үезин хандырарынга байдалдарны тургузуп болур дээрзин регионнуң удуртукчузу демдеглээн. Күрүне эрге-чгырга органнары болгаш прокуратураның аразында билчилгелиг кады ажылдажылга регионнуң бүгү чурттакчыларының амыдырал-чуртталгазының шынарын бедидеринге идигни бээр дээрзинге ол бүзүрелин илереткен.
2021 чылдан 2025 чылга чедир регионга прокурор кылдыр ажылдаан Сергей Дябкинниң орнунга 2025 чылдың декабрь эгезинде келген Евгений Борисович Ботвинкин Тыва Республиканың прокурору кылдыр томуйлаттырган. Юстицияның 3-кү класстың күрүне чөвүлекчизи Евгений Ботвинкин бодунуң профессионал ажыл-чорудулгазын 1989 чылда прокуратура органнарынга эгелээн, Тывага прокурорлап кээр мурнунда Ханты-Манси автономнуг округ – Юграның прокурорунга ажылдаан.
тольк