Тыва Республиканың Национал хөгжүм-шии театрынга Россияның студентилер хүнү — Татьяна хүнүнге тураскааткан ректор балы болуп эрткен. Байырлыг хемчегге Тываның күрүне университединиң активчилери, республиканың ортумак профессионал өөредилге черлериниң сургуулдары, Кызылдың президентиниң кадет училищезиниң кадеттери киришкен.
Тываның Чазааның Даргазының оралакчызы Алексей Сазан-оол ачы-буян акциязының киржикчилеринге Тываның Баштыңы Владислав Ховалыгның өмүнээзинден байырны чедирип, чурттуң хөгжүлдезинге аныяктарның улуг ролюн демдеглээн. «Бөгүн силер Россияның келир үезин тургузуп турар бистиң чурттуң эң-не үнелиг эртинези-дир силер. Бодуңарның арга-курлавырларыңарны сайзырадып, чаа-чаа делгемнерни ажыдып, дидим бодалдарыңны боттандырып, бистиң амыдыралывысты экижидип турар силер. Силерге төнчү чок хей-аътты, онзагай ажыдыышкыннарны, бүзүрелдиг чаңгыс үзел-бодалдыг кижилерни болгаш сорулгаларыңарже быжыг бурунгаарлаашкынны күзедим. Чаа бедиктерни чедип алыңар, бистиң чурттуң келир үези силерде дээрзин сактып чоруңар» — деп, Чазак Даргазының оралакчызы чугаалааш, Тываның Баштыңының шаңналдарын тергиин студентилерге тывыскан.
Бо чылын тускай шериг операциязының хоочуннары — «Тываның маадырлары» кадрлар программазының тиилекчилери Ректорнуң ачы-буян балынга бир дугаар киришкеннер. Олар өөнүң иштилери болгаш Тываның күрүне университединиң башкылары-биле кады «Мээң Россиям» деп вальсты бараалгатканнар. Ону уран чүүл удуртукчузу Максим Овчинников тургускан.
Ачы-буян балындан кирген шупту акша-хөреңгини тускай шериг операциязының зоназында хүлээлгезин эрттирип турар чаңгыс чер чурттугларынга дузаламчы кылдыр чорударын Тываның күрүне университеди дыңнаткан.
Бал үезинде Тываның күрүне университединиң ректорунуң стипендиязын мөөрейниң тиилекчилеринге тывыскан. Конкурс шилилгези-биле 60 кордакчы аразындан 9 стипендия алыкчылары тодараттынган.